چوارچێوەی هەماهەنگی ناوی کاندیدەکان بۆ سێ کەس کەم دەکات

ئاڤا نیوز

 

ئەندامێكی ڕەوتی حیكمەی نیشتمانی ڕایدەگەیێنێت، چوارچێوەی هەماهەنگی دوای چاوپێكەوتن لەگەڵ 15 كەسایەتی، ناوی كاندیدەكانی كەمكردوونەتەوە بۆ سێ كەس كە ركابەرێتیی بكەن بۆ بەدەستهێنانی پۆستی سەرۆكوەزیرانی داهاتووی عێراق.

 

وێنە گەورەكە: دوای تێپەڕبوونی زیاتر لە هەفتەیەك بەسەر هەڵبژاردنی پەرلەمانیی عێراقدا كە لە 11ی تشرینی دووەمی 2025 بەڕێوەچوو، 12 سەركردەی لایەنە شیعییەكانی نێو چوارچێوەی هەماهەنگی بە ئامادەبوونی محەممەد شیاع سودانی، سەرۆكوەزیانی عێراق، واژۆیان لەسەر ڕاگەیاندنی گەورەترین فراكسیۆنی پەرلەمان كرد، كە توانای پێشكەشكردنی كاندیدی سەرۆكوەزیرانیان دەبێت.

 

لێدوانی ڕۆژنامەوانی: فەهد جبووری، ئەندامی ڕەوتی حیكمەی نیشتمانی لە چاوپێكەوتنێكی تەلەڤزیۆنیدا ئاشكرای دەكات، چوارچێوەی هەماهەنگی چاوپێكەوتنی لەگەڵ 15 كەسایەتی كاندید بۆ پۆستی سەرۆكوەزیران كردووە و لە كۆتاییدا سێ كاندیدی هەڵبژاردووە. بەبێ ئەوەی ناوەكانی ئاشكرا بكات.

 

ئەوەی پێویستە بیزانیت: چوارچێوەی هەماهەنگی میكانیزمێكی بۆ هەڵبژاردنی سەرۆكوەزیران داناوە، كە لە ڕێگەی دوو لیژنەوە جێبەجێ دەكرێت: یەكێكیان لەناو چوارچێوەی هەماهەنگی و ئەوی دیكەیان بە سەرۆكایەتی نووری مالیكی، بۆ گفتوگۆكردن لەسەر شایستە پەرلەمانییەكانە. گرنگترین مەرجیش بۆ سەرۆكوەزیرانی داهاتوو ئەوەیە، كەسێك بێت كە ململانێ دروست نەكات بۆ پێكهاتە سیاسییەكانی دیكە لەسەر ئاستی كورد و سوننە.

 

باكگراوند: پۆستی سەرۆكوەزیرانی عێراق وەكو عورفێكی سیاسی بەركەوتەی پێكهاتەی شیعەكانە و یەكێكە لە پۆستە زۆر گرنگ و كاریگەرەكان و دەسەڵاتێكی فراوان و كاریگەریی هەیە لەسەر ئاستی ناوخۆ و دەرەوەی عێراق، هەربۆیە هەموو جارێک تەتەڵە کردن و کەمکردنەوەی ژمارەی کاندیدەکان بۆ تەنها یەک کاندید مشتومڕی زۆری لێدەکەوێتەوە.