چوارچێوەی هەماهەنگی پرسی سەرۆکوەزیران و سەردانی مالیکی بۆ هەولێر تاوتوێ دەکات

ئاڤا نیوز

سەرچاوەیەکی بەرپرس لە چوارچێوەی هەماهەنگی ڕایدەگەیێنێت، سەرکردەکانی چوارچێوەکە کۆبوونەوەیەکی گرنگ لە ماڵی هادی عامری، ئەمینداری گشتیی ڕێکخراوی بەدر، لە بەغدا ئەنجام دەدەن.

ئەوەی پێویستە بیزانیت: ڕۆژی 11/22، نووری مالیکی، سەرۆکی هاوپەیمانی دەوڵەتی یاسا گەیشتە هەولێر، لە پیرمام سەرۆک بارزانی و دواتر لەگەڵ سەرۆکوەزیران مەسرور بارزانی کۆبووەوە. 

زانیاریی بەدەستهاتوو: سەرچاوەیەکی بەرپرس لە چوارچێوەی هەماهەنگی بە "ئاڤا"ی ڕایگەیاند، "سەرکردەکانی چوارچێوەی هەماهەنگی، ئێوارەی ئەمڕۆ دووشەممە، کۆبوونەوەیەکی گرنگ لە ماڵی عامری ئەنجام دەدەن بۆ تاوتوێکردنی دوایین کاری لیژنەی تایبەتی چوارچێوەکە لەبارەی دیاریکردنی سەرۆکوەزیرانی داهاتوو و ئەو ناوانەی کە گەیشتوونەتە دەستیان و دڵنیابوونەوە لە گونجانیان لەگەڵ مەرج و پێوەرەکانی کە لە کۆبوونەوەی پێشووی سەرکردەکانی چوارچێوەکەدا دانرابوون."

ئەوەی ئێستا ڕوودەدات: سەرچاوەکە وتیشی: "سەرکردەکانی چوارچێوەی هەماهەنگی، ئەنجامی سەردانەکەی نووری مالیکی، سەرۆکی هاوپەیمانی دەوڵەتی یاسا، بۆ هەولێر و کۆبوونەوەکانی لەگەڵ سەرکردەکانی کورد تاوتوێ دەکەن، سەبارەت بە پرۆسەی پێکهێنانی حکومەتی نوێی عێراق، هەروەها ئەنجامی سەردانە ئاڵوگۆڕکراوەکانی دیکەی نێوان سەرکردەکانی چوارچێوەکە و کەسایەتییە سیاسییەکانی دیکەی بەغدا."