شاندی پەرلەمانی تورکیا لە ئیمرالی گەڕانەوە: دانیشتن لەگەڵ ئۆجەلان ئەرێنی بوو

ئاڤا نیوز

شاندای پەرلەمانی توکیا دوای گەڕانەوەی لە زیندانی ئیمرالی ڕایگەیاند، دانیشتنیان لەگەڵ عەبدوڵڵا ئۆجەلان ئەرێنی بووە بۆ سەرخستنی پرۆسەی ئاشتی.

چیرۆکی سەرەکی: کۆمیسیۆنی یەکڕیزیی نیشتمانیی پەرلەمانی تورکیا کە بۆ سەرخستنی پرۆسەی ئاشتی لەنێوان پەکەکە و حکومەتی تورکیا دامەزراوە، دوای ١٨ جار کۆبوونەوەی ناوخۆیی، ئەمڕۆ سەردانی عەبدوڵڵا ئۆجەلان، ڕێبەری زیندانیکراوی پەکەکەی کرد لە دوورگەی ئیمرالی، دوای گەڕانەوەشیان ڕاگەیێنراوێکیان بڵاو کردەوە. 

ڕاگەیێنراوی فەرمی: دەستەی سەرۆکایەتیی پەرلەمانی تورکیا ڕایگەیاند، کۆمیسیۆن چووەتە ئیمرالی، لەگەڵ عەبدوڵڵا ئۆجالان کۆبوونەتەوە، ئەنجامەکەی ئەرێنی بووە بۆ سەرخستنی پرۆسەی ئاشتی و پتەوکردنی برایەتی نێوان کورد و تورک، پرۆسەکە بە ئەرێنی هەنگاو دەنێت بەرەو ڕوانگەیەکی ناوچەیی.

جەختیش دەکاتەوە کۆمیسیۆنەکە هەڵوێستی یەکلاکەرەوەی خۆی دەپارێزێت و بەردەوام دەبێت لە گەیشتن بە ئامانجەکانی لە داهاتوودا.

زانیاریی زیاتر: ئەندامانی شاندەکە پێکهاتبوون لە گوڵستان کڵچ کۆچی غیت، جێگری سەرۆکی فراکسیۆنی دەم پارتی، حوسێن یایمان، یاریدەدەری سەرۆکی گشتیی ئاکپارتی و فەتی یەڵدز، یاریدەدەری سەرۆکی گشتیی مەهەپە بۆ کاروباری یاسایی و هەڵبژاردن، جەهەپە گەورەترین پارتی ئۆپۆزیسیۆنی تورکیا لە شاندەکە بەشدار نەبوو. 

ئەوەی لەبارەیەوە دەگوترێت: پێش کۆبوونەوەکە وابڵاوکرایەوە دوو بەش دەبێت:

یەکەم: سەرەتا ئۆجەلان لەبارەی ڕەخساندنی زەمینەسازیی یاسایی بۆ سەرخستنی پرۆسەی ئاشتی و هاوپەیمانێتیی کورد و تورک قسەی کردووە، کە خۆی دەبینێتەوە لە داننان بە مافەکانی کورد لە ڕووی یاسایی و دەرکردنی یاسا بۆ گەڕانەوەی گەریلاکان بۆ ناو کەسوکاریان.

دووەم: بەشی دووەمیش تەرخان کراوە بۆ پرسیاری ئەندامانی شاندەکە لە ئۆجەلان و وەڵامدانەوەیان، یەکێک لە پرسیارەکان؛ ئایا چەکدانان و خۆهەڵوەشاندنەوە هەسەدەش دەگرێتەوە یاخود نا؟