بەشێکی شەقامی 100 مەتریی سلێمانی بەڕووی شۆفێران دەکرێتەوە

ئاڤا نیوز

شارەوانیی سلێمانی ئاماژە بەوەدەدات، کارکردن لە شەقامی 100 مەتریی سلێمانی بەردەوامە و لە چەند ڕۆژی داهاتوو بەشێکی دەکرێتەوە، ساڵی داهاتووش تەواوی شەقامەکە بەڕووی شوفێران دەکرێتەوە.

 

چیرۆکی سەرەکی: شەقامی 100 مەتریی سلێمانی کە بە "شاڕێی بابان"یش ناسراوە، یەکێکە لە پڕۆژە ستراتیژییەکان و درێژییەکەی 37 کیلۆمەترە، پڕۆژەکە 7 یەکتربڕ، پێنج ئەندەرپاس، چوار پرد و فلای ئۆڤەرێک و 68 ئاوبەرە لەخۆدەگرێت. بڕیاربوو پێش هەڵبژاردن بکرێتەوە، بەڵام بەهۆی هەندێ گرفتی تەکنیکی دواکەوت.

 

لێدوانی فەرمی: زەردەشت ڕەفیق، وتەبێژی شارەوانیی سلێمانی بە ئاڤای گوت، "لەماوەی چەند ڕۆژی داهاتوودا، 26 کیلۆمەتر لە شەقامی 100 مەتریی شاری سلێمانی بەڕووی هاتووچۆی هاونیشتمانیان دەکرێتەوە، کە دەبێتە هۆی ئاسانکاریی زیاتر بۆ شۆفێران."

 

ئەوەی پێویستە بیزانیت: ئەو 26 کیلۆمەترەی تەواو بووە و لە چەند ڕۆژی داهاتوو دەکرێتەوە، تاسڵوجە بە شەقامی تانجەڕۆ دەبەستێتەوە، شەقامەکە لە ڕێگەی بەرزە پردێکەوە بە گەڕەکی بەکرەجۆش دەبەسترێتەوە.

 

ئەمەش بزانە؛ پڕۆژەی شەقامی 100 مەتریی شاری سلێمانی پڕۆژەیەکی ستراتیژییە کە لە 11-7-2020، سەرۆکوەزیران مەسرور بارزانی، بەردی بناغەی پڕۆژەکەی دانا و دەست بە کارکردن لە شەقامەکە کرا. شەقامەکە 400 ملیار دیناری بۆ تەرخان کراوە.