حەج و عومرە: بەبێ دەرچوون لە پشکنینی پزیشکی ڤیزا بە هیچ حاجییەک نادرێت

ئاڤا نیوز

 

بەڕێوەبەرایەتیی گشتیی حەج و عومرەی هەرێمی کوردستان ڕایدەگەیەنێت، ئەمساڵ سعودیە مەرجێکی نوێی بۆ پێدانی ڤیزای حەج داناوە و هەر هاووڵاتییەک لە پشکنینی پزیشکی دەرنەچێت، مافی ئەنجامدانی حەجی نابێت.

 

لێدوانی فەرمی: کاروان ستونی، وتەبێژی فەرمیی بەڕێوەبەرایەتیی حەج و عومرەی هەرێمی کوردستان، لە لێدوانێکی تایبەتدا بە ئاڤای ڕایگەیاند، سەرجەم ئەو کەسانەی بۆ ئەمساڵ ناویان بۆ بەجێهێنانی فەریزەی حەج دەرچووە، پابەند دەکرێن بە ئەنجامدانی پشکنینی پزیشکی.

 

وتەبێژی حەج و عومرە ئاماژەی بەوە دا، دەسەڵاتدارانی عەرەبستانی سعودیە مەرجێکی پێشوەختەیان داناوە بۆ دڵنیابوون لە توانای جەستەیی حاجیان، بەو پێیەی "پێدانی ڤیزا ڕاستەوخۆ بەستراوەتەوە بە ئەنجامی پشکنینەکانەوە و دەبێت کەسەکە لە رووی تەندروستییەوە شیاو بێت بۆ ئەوەی ڕێگەی پێبدرێت حەج بکات."

 

زانیاریی زیاتر: سەبارەت بە میکانیزمی جێبەجێکردنی بڕیارەکە، کاروان ستونی ڕوونی کردەوە: "بە هەماهەنگی لەگەڵ وەزارەتی تەندروستی حکوومەتی هەرێمی کوردستان، چەندین لیژنەی تایبەت بۆ ئەنجامدانی پشکنینەکان پێکهێنراون."

 

ئەوەشی خستەڕوو، دوای ئەنجامدانی پشکنینەکان، ئەنجامەکان لە ڕێگەی سیستەمێکی ئەلیکترۆنییەوە بۆ سعودیە بەرز دەکرێنەوە، تاوەکو پرۆسەی پێدانی ڤیزا بە حاجیان دەستپێبکات.