تەقەدووم: حەلبووسی کاندیدمانە بۆ سەرۆکی کۆمار یان پەرلەمان

ئاڤا نیوز

سەرکردەیەکی پارتی تەقەدووم ڕایدەگەیێنێت، محەممەد حەلبووسی کاندیدی پارتەکەیانە بۆ پۆستی سەرۆک کۆمار یان سەرۆکی پەرلەمان. ئاماژە بەوەش دەدات، نوێنەرایەتی سوننەکان لە حەشدی شەعبیدا تەنیا "دیکۆرە".

 

وێنە گەورەکە: بەپێی نەریتێکی سیاسی لە دوای ساڵی 2005 ـەوە، پۆستی سەرۆککۆماری عێراق پشکی کورد بووە، سەرۆکوەزیران بۆ شیعە و سەرۆکی پەرلەمانیش بۆ سووننە. بەڵام ئەمجارە بابەتی وەرگرتنی پۆستی سەرۆککۆمار چەند جارێکە لەلایەن پارتەکەی حەلبووسییەوە دەوروژێنرێت.

 

لێدوانی ڕۆژنامەوانی: ئەحمەد مەساری، سەرکردە لە پارتی تەقەدووم لە دیدارێکی تەلەڤیزیۆنیدا ڕایگەیاند، پارتەکەیان 11 کورسی لە بەغدا بەدەستهێناوە و ماراسۆنی پێکهێنانی حکومەت دەستی پێکردووە و کۆبوونەوەکان چڕ بوونەتەوە.

 

پەیامی فەرمی: مەساری ڕایدەگەیێنێت، "دابەشکردنی سێ سەرۆکایەتییەکە (کۆمار، پەرلەمان و وەزیران) بەپێی نەریتە نەک دەستوور، پارتی تەقەدووم حەلبووسی بە کاندیدی خۆی دەزانێت بۆ هەر پۆستێکی سیادی، جا چ سەرۆکایەتی کۆمار بێت یان پەرلەمان.

 

لەهەمان کاتدا: مەساری ڕایگەیاند، پارتی دەعوە مافی هەیە مالیکی کاندید بکات بۆ سەرۆکوەزیران، بەڵام چانسەکانی کەمە. "هیوادارین چوارچێوەی هەماهەنگی کەسایەتییەکی بەهێز و دوور لە تایفەگەری پێشکەش بکات".

 

لەلایەکی دیکەوە: مەساری جەختی لەوە کردەوە کە حەشدی عەشایەری "دیکۆرە" لەناو حەشدی شەعبیدا و تەنیا حەشدی شیعە ڕاستەقینەیە. گوتیشی: حەشدی شەعبی شایستەی ئەوەیە هاوشێوەی دەزگای دژەتیرۆر بێت، لە مەشق و ڕێکخستن و شانازیدا"، هاوکات "ڕەتیدەکەینەوە گرووپەکان کۆنترۆڵی حەشدی شەعبی بکەن و پێویستە چەکەکانیان ڕادەست بکەن".