حکومەتی عێراق بودجەی نەخۆشخانە 400 قەرەوێڵەییەکەی کەرکووک زیاد دەکات

ئاڤا نیوز

 

ئەنجوومەنی وەزیرانی عێراق لە کۆبوونەوەی ڕۆژی سێشەممەیدا بڕیاریدا بودجەی نەخۆشخانە 400 قەرەوێڵەییەکە و پڕۆژەی ئاوەڕۆی کەرکووک زیاد بکات، میکانیزمێکی نوێشی بۆ پەیوەندیی نێوان بانکی بازرگانی عێراق و بانکە بیانییەکان پەسەند کرد.

 

وێنە گەورەکە: نەخۆشخانە 400 قەرەوێڵەییەکەی کەرکووک ماوەی 14 ساڵە بەردی بناغەی دانراوە و تائێستا تەواونەکراوە، بەرپرسانی حکومەتی عێراق هۆکارەکەی بۆ قەیرانی ئابووری، شەڕی داعش و بڵاوبوونەوەی کۆرۆنا دەگەڕێننەوە، پڕۆژەکە بە گوژمەی 145 ملیۆن دۆلار دروستدەکرێت و ئەمساڵ تیایدا دەستبەکارکراوەتەوە، بڕیاریشە ناوەڕاستی ساڵی داهاتوو تەواوببێت.

 

ڕاگەیێنراوی فەرمی: ئەنجوومەنی وەزیرانی عێراق لە کۆبوونەوەی ڕۆژی سێشەممەیدا بڕیاریدا بە زیادکردنی تێچووی گشتی و بڕی پارەی یەدەگ بۆ چەند پڕۆژەیەک، لەوانەش زیادکردنی بودجەی پڕۆژەی دامەزراندنی نەخۆشخانەیەکی (400) قەرەوێڵەیی لە کەرکووک و پڕۆژەی ئاوەڕۆی کەرکووک.

 

هەر لە کۆبوونەوەکەدا ئەنجومەنی وەزیران میکانیزمێکی تازەی بۆ ڕێکخستنی پەیوەندی نێوان بانکی بازرگانیی عێراق و بانکە بیانییەکان پەسەند کرد، کە تایبەت بە وەرگرتنەوەی پارەکان لە بەرامبەر گەرەنتی دڵنیایی (خطابات الضمان).