خوێندنەی کتێب لە چاکسازیی گەورانی هەولێر ڕووی لە زیادبوون کردووە

ئاڤا نیوز

 

سزادراوان لە چاکسازیی گەورانی هەولێر ڕوویان لە خوێندنەوەی کتێب کردووە و تەنیا لە ماوەی یەک مانگدا دوو هەزار و 50 کتێب لەو چاکسازییە خوێنراونەتەوە.

 

وێنە گەورەکە: وەک بەشێک لە پلانی چاکسازیی سزادراوان، لە سەرجەم چاکسازییەکانی هەرێمی کوردستان ژمارەیەک چالاکی و پڕۆگرامی ڕۆشنبیری و هونەری و کولتووری و وەرزشی ئەنجام دەدرێن، یەکێک لەو پرۆگرامانە بوونی کتێبخانەیە لە چاکسازییەکان، سزادراوان دەتوانن کتێب وەربگرن و بیخوێننەوە.

 

ئەوەی ئێستا ڕوودەدات: سزادراوان لە چاکسازیی گەورانی هەولێر ڕوویان لە خوێندنەوە کتێب کردووە، بەجۆرێک تەنیا لە ماوەی یەک مانگدا دوو هەزار و 50 کتێب لەو چاکسازییە خوێنراونەتەوە، بەرپرسانی چاکسازییەکەش ئاماژە بۆ ئەوە دەکەن مانگ دوای مانگ خواست لەسەر خوێندنەوە لە لایەن سزادراوان زیاتر دەبێت.

 

زانیاریی زیاتر: کتێبخانەی چاکسازیی گەورانی هەولێر ، نۆ هەزار و 653 کتێب و شەش هەزار و 653 ناونیشانی جیاوازی لەخۆگرتووە، بە تایبەت لە بوارەکانی ئاینی، ڕۆشنبیری، مێژوویی، کۆمەڵایەتی، ئەدەبی، سیاسی و کۆمەڵایەتی.

 

ئەمەش بزانە: کتێبخانەکە لەلایەن هۆبەی توێژینەوەی چاکسازییەکە سەرپەرشتی دەکرێت، هەموو سزادراوان دەتوانن کتێب وەربگرن، دوای خوێندنەوەش دەبێت کتێبەکە بگەڕێننەوە کتێبخانەکە.

 

وەک هاندانێک بۆ ئەوەی سزادراوان زیاتر کتێب بخوێننەوە، بەردەوام لەو کتێبخانەیە کۆڕ و سیمینار بۆ سزادراوان دەکرێت.