بزووتنەوەی ئیسلامی: داوا دەکەین حکومەتی عێراق ئەو کەس و گرووپانە بدۆزێتەوە کە هێرشیان کردووەتە سەر کۆرمۆر

ئاڤا نیوز

 

بزووتنەوەی ئیسلامیی کوردستان ئیدانەی هێرشی سەر کێڵگەی غازی کۆرمۆر دەکات و داوا لە حکومەتی عێراق دەکات "بەزووترین کات ئەو کەس و گرووپانە بدۆزێتەوە کە ئەو کارە تیرۆرستی و ترسنۆکانەیان ئەنجام داوە و بەسزای یاسایی خۆیان بگەیەنن".

 

چیرۆکی سەرەکی: کاتژمێر 11:30ـی شەوی ڕابردوو، 26-11-2025، هێرش کرایە سەر کێڵگەی کۆرمۆر لە چەمچەماڵ، بەهۆیەوە بەشێکی کێڵگەکە زیانی زۆری بەرکەوتووە و هەناردەی غاز بۆ وێستگەکانی کارەبا ڕاگیراوە.

 

پەیامی فەرمی: د.عەبدوڵڵا وەرتێ، وتەبێژی بزووتنەوەی ئیسلامیی کوردستان ڕایگەیاند: شەوی ڕابردوو لەلایەن دەستێکی ڕەشی نادیارەوە هێرشێکی ناڕەوا کرایەسەر کێڵگەی غازی کۆرمۆر، کە بووە هۆی پچڕانی کارەبا لە زۆرینەی شارەکانی کوردستان.

 

-ئێمە لە بزووتنەوەی ئیسلامیی کوردستان زۆر بەتوندیی ئیدانەی ئەو هێرشە نامرۆڤانەیە دەکەین، داواش لە حکومەتی عێراق دەکەین بەزووترین کات ئەو کەس و گرووپانە بدۆزێتەوە کە ئەو کارە تیرۆرستی و ترسنۆکانەیان ئەنجام داوە و بەسزای یاسایی خۆیان بگەیەنن.

 

-ئەو جۆرە دامەزراوانە موڵکی هەموو هاونیشتمانیانن و پەیوەندی ڕاستەوخۆیان هەیە بە جەوهەری ژیانی هاونیشتمانیان بۆیە پاراستنیان لە ئەستۆی حکومەتی عێڕاق و حکومەتی هەرێمی کورستاندایە، ئەوە بۆ چەندین جارە بەئامانج دەگیرێن بەڵام تائێستا بکەرانی ئەو تاوانە دەستگیر نەکراون ئەوەش مایەی نیگەرانی قوڵمانە.