وەزارەتی دەرەوەی سووریا: ئیسرائیل لە کۆمەڵکوژییەکەی بەیت جن بەرپرسیارە

ئاڤا نیوز

وەزارەتی دەرەوەی سووریا بە تووندی ئیدانەی بۆردومانەکانی سوپای ئیسرائیل بۆ سەر شارۆچکەی "بەیت جن" لە دەورووبەری دیمەشق دەکات و دەڵێت: " ئیسرائیل لە کوژرانی زیاتر لە 10 هاووڵاتی مەدەنی بەرپرسیارە ".

وێنە گەورەکە: سەرچاوەیەکی پزیشکیی سووریا ئاشکرای کرد، بەهۆی تۆپباران و موشەکبارانی چڕی ئیسرائیل بۆ سەر شارۆچکەی "بەیت جن" کە نزیکەی 10 کیلۆمەتر لە سنووری بەرزاییەکانی جۆلانەوە، 13 کەس کوژراون کە لەنێویاندا ژن و منداڵ هەن، هەروەها ژمارەیەکی دیکەش بریندار بوون. 

ڕاگەیێنراوی فەرمی: لە بەیاننامەکەی وەزارەتی دەرەوەی سووریادا هاتووە: "هێزەکانی داگیرکەری ئیسرائیل دوای ئەوەی شکستیان هێنا لە دزەکردن و پێشڕەویکردن، بە شێوەیەکی دڕندانە ناوچەکەیان بۆردومان کردووە و کۆمەڵکوژییەکی مەترسیداریان ئەنجامداوە. 

زانیاریی زیاتر: وەزارەتەکە جەختیشی کردووەتەوە، کە دیمەشق حکومەتی ئیسرائیل بە بەرپرسیاری تەواوی ئەم دەستدرێژییە مەترسیدارە دەزانێت و هۆشداریدا لەوەی بەردەوامیی ئەم هێرشانە ئاسایشی تەواوی ناوچەکە دەخاتە مەترسییەوە.