شێروان دووبەردانی: زیندانیانی سیاسیی هەرێمی كوردستانیش لە هەمواری یاسای زیندانیانی سیاسی سوودمەند دەبن

ئاڤا نیوز

ئەندامێكی لیژنەی شەهیدان و قوربانیان و زیندانیانی سیاسی لە پەرلەمانی عێراق ڕایدەگەیێنێت، ڕێككەوتن لەنێوان هەردوو حكومەتی فیدڕاڵ و هەرێمی كوردستان كراوە، زیندانیانی سیاسیی هەرێمی كوردستان لە هەمان ئەو ماف و ئیمتیازاتانە سوودمەندبن كە زیندانیانی سیاسیی ناوچەكانی دیكەی عێراق، هەیانە.

چیرۆكی سەرەكی: شێروان دووبەردانی، پەرلەمانتاری عێراق و ئەندامی لیژنەی شەهیدان و قوربانیان و زیندانیانی سیاسی، بەشداریی كۆبوونەوەیەكی بەرپرسانی باڵای وەزارەتی شەهیدان و ئەنفالكراوانی هەرێمی كوردستانی كرد كە تێیدا سەرۆكی دەزگای زیندانیانی سیاسیی حكومەتی فیدڕاڵیش ئامادەبوو، دۆسیەكانی پەیوەست بە ماف و شایستەكانی زیندانیانی سیاسی و ئامرازەكانی جێبەجێكردنی ئەو گۆڕانكارییانەی كە بەسەر یاسای زیندانیانی سیاسیدا هاتووە، تاوتوێ كران.

لێدوانی فەرمی: شێروان دووبەردانی، ئەندامی ئەنجوومەنی نوێنەرانی عێراق ڕایگەیاند، لەگەڵ بەرپرسانی هەرێمی كوردستان، تاوتوێی جێبەجێكردنی هەمواری یاسای زیندانیانی سیاسیی ژمارە 4 ـی ساڵی 2006 كرا كە بە یاسای ژمارە 35ی ساڵی 2013 هەمواركراوەتەوە، لەپێناو هێنانەدیی دادپەروەری لە ماف و شایستەكانی زیندانیانی سیاسی لە تێكڕای عێراق، لەو چوارچێوەیەشدا گەیشتینە ڕێككەوتن لەسەر سوودمەندبوونی زیندانیانی سیاسیی هەرێمی كوردستان لەهەمان ماف و شایستەكان، بە لەبەرچاوگرتنی بژێوی ژیانیان و دابینكردنی پێداویستییەكانیان.

هاوكات دووبەردانی جەختی لە پتەوكردنی هەماهەنگیی نێوان هەردوو وەزارەتی شەهیدان و ئەنفالكراوانی هەرێمی كوردستان و دەزگای زیندانیانی سیاسی كردەوە، لەپێناو خێرا جێبەجێكردنی هەمواری یاساكە.

ئەوەی پێویستە بیزانیت: مامەڵەی 25 هەزار و 807 زیندانیان و گیراوی سیاسی لە وەزارەتی شەهیدان و ئەنفالكراوان تەواوبووە بەمەبەستی گواستنەوەی دۆسیەكانیان بۆ سەر دەزگای زیندانیانی سیاسیی عێراق، بەمەش کۆمەڵێک ماف و ئیمتیازیان پێدەدرێت کە پێشتر لێی بێبەش بوونە، لەوانەش؛ زیادبوونی مینحە، قەرەبووکردنەوەی ئەو ڕۆژانەی لە زیندانبوون، پێدانی زەوی و پارە بۆ کڕینی یەکەی نیشتەجێبوون و دابینکردنی بڕێک بۆ چارەسەر یان خوێندن یاخود حەج و عومرە.