ڕێکخراوەکانی کۆمەڵی مەدەنی: هێرشی کۆرمۆر لێدانە لە ئابووری و خزمەتگوزاریی خەڵک

ئاڤا نیوز

بەرامبەر بەو هێرشەی بۆ سەر کێڵگەی کۆرمۆر ئەنجامدرا، ڕێکخراوەکانی کۆمەڵی مەدەنی داوا لە حکومەتی فیدڕاڵی و حکومەتی هەرێمی کوردستان دەکەن، هەنگاوی کرداری بنێن بۆ ئەوەی ڕاستییەکان بۆ خەڵک ئاشکرا بکرێن.

 
چیرۆکی سەرەکی: ئەنجامدانی هێرشەکەی سەر کێڵگەی غازی کۆرمۆر، کاردانەوەی ناوخۆیی و جیهانیی بەدوای خۆیدا هێنا، لە سۆنگەی ڕۆڵی گرنگیی ڕێکخراوەکانی مەدەنی لە گەیاندنی پەیام و دروستکردنی فشار و ڕای گشتی، ڕێکخراوەکان داوا دەکەن لێپرسینەوە لە هەموو ئەو کەسانە بکرێت کە ئەم کارە تاوانکارییەیان ئەنجامداوە.

 
ڕاگەیێنراوی فەرمی: دوای هێرشەکەی سەر کێڵگەی غازی کۆرمۆر، 54 ڕێکخراوی کۆمەڵی مەدەنی لە کوردستان و لە عێراق لە ڕاگەیێنراوێکدا دەڵێن، دەنگی خۆمان یەکدەخەین داوا دەکەین حکومەتی فیدڕاڵی و حکومەتی هەرێمی کوردستان دەستبەجێ هەنگاوی کرداری بنێن، بۆئەوەی ڕاستییەکان بۆ خەڵک ئاشکرا بکەن و لێپرسینەوە لە هەموو ئەو کەسانە بکەن کە ئەم کارە تاوانکارییەیان ئەنجامداوە.

زانیاریی زیاتر: لە ڕاگەیێنراوەکەی ڕێکخراوەکانی کۆمەڵی مەدەنی هاتووە، هێرشەکەی سەر کێڵگەی کۆرمۆر مەترسی لەسەر ئابووری و خزمەتگوزاریی تەواوی گەلانی عێراق دروست دەکات، لێدانە لەسەلامەتی و مافی سەرەکی هاووڵاتییان. ناکرێت ناکۆکی سیاسی ببێتە هۆی کرداری تیرۆرستی و تێکدانی ئابووری و ئاسایش و سەقامگیری و پەکخستنی خزمەتگوزارییە گشتییەکان. ئەوانەی ئەم تاوانەیان ئەنجامداوه نابێت لە سزا دەربازببن.