لە پێشانگاکەی زاخۆ زیاتر لە 100 گەنج كاریان دەسكەوت

ئاڤا نیوز

لە پێشانگای دەلال بۆ هەلی كار، نزیكەی هەزار و 500 هاونیشتمانی بۆ دەسكەوتنی كار سیڤیی خۆیان داوەتە 30 كۆمپانیای بەشداربووی پێشانگاكە؛ زیاتر لە 100 دەرفەتی كار بەشێوەی ڕاستەوخۆ بۆ گەنجان ڕەخسا.

وێنە گەورەکە: ئەمڕۆ، پێشانگای دەلال بۆ هەلی كار لە زاخۆ بە سپۆنسەری میدیایی ئاڤا میدیا بە ناونیشانی "پردی نێوان لێهاتوویی و دەرفەتەکان" کرایەوە، كوردستان فاوندەیشن بەهاوبەشی لەگەڵ زانكۆی زاخۆ، و لەڕێگەی JOBS.KRD ڕێكیخستبوو، 30 كۆمپانیاش لە بوارە جیا جیاكانی ئۆتۆمبێل، گەیاندن، مۆبیلیات، خوێندنی ئەهلی و چەندین بواری دیكە بەشداربوون و ماوەی یەك ڕۆژ بەردەوامبوو.

زانیاریی پەیامنێر: جاسم محەممەد، پەیامنێری ئاڤا دەڵێت: لە پێشانگاکە زیاتر لە 100 هەلی كار بە ڕاستەوخۆ بۆ گەنجان ڕەخساوە، نزیكەی هەزار و 500 كارخوازیش خواستی كاركردنیان بۆ كۆمپانیا بەشداربووەكان دەربڕیووە.

لێدوانی فەرمی: جوان نەریمان،  یەکێک لە ڕێکخەرانی پێشانگای دەلال بە ئاڤای ڕاگەیاند: ئەمە جاری یەكەمە، پێشانگای لەمجۆرە لە زاخۆ دەكرێتەوە، كە گرنگی زۆری هەیە بۆ دۆزینەوەی كار بۆ خوازیاران و وادەكات گەنجان بەئاسانی دەستیان بە كۆمپانیاكان بگات.

باسی لەوەشكرد، لە ڕێگەی پلاتفۆڕمی JOBS.KRD كە ماڵپەڕێكی فەرمیی حكومیە بۆ دۆزینەوەی كار، بە سێ زمان زیاتر لە هەزار و 900 هەلی کارمان ڕاگەیاندووە و31 هەزار داواکاریش بۆ دەسكەوتنی كار پێشکەشکراون.