چالاكییەكانی سێیەم فێستیڤاڵی هەڵپەڕكێی مەهاباد بەڕێوەدەچێت

ئاڤا نیوز

29 گرووپی هونەریی كوردی، بە 97 بەرهەم لە سێیەمین فێستیڤاڵی هەڵپەڕكێی مەهاباد بەشدارن، لەنێو سەرجەم گروپە بەشداربووەكانیش؛ 10 گرووپ گەیشتوونەتە قۆناغی كۆتایی و كێبڕكێ دەكەن لەسەر بردنەوەی پلەكانی یەكەم و دووەم و سێیەم.

چیرۆکی سەرەکی: ساڵانە لە شاری مەهاباد لە ڕۆژهەڵاتی كوردستان، فێستیڤاڵی هەڵپەڕكێ سازدەكرێت، ئەمساڵیش بۆ جاری سێیەم فێستیڤاڵەكە ڕێكخرا، لە ڕۆژی یەكەمدا؛ لیژنەیەكی هەڵسەنگاندنی سەرەتایی، سەرجەم كارەكانی بەشداربووانیان هەڵسەنگاند و 10 گروپ دیاریكران بۆ ئەوەی لە قۆناغی كۆتایی كێبڕكێ لەسەر بەدەستهێنانی پلەكانی پێشەوە بكەن و ببنە براوەی خەڵاتەكانی فێستیڤاڵەكە.

لێدوانی فەرمی: ڕابەر كوردستانی، بەڕێوەبەری فێستیڤاڵەكە تایبەت بە ئاڤا وتی، گروپە هونەرییەكان لەسەرجەم شارە كوردییەكانەوە هاتوون؛ لە ئیلام، كرماشان، سنە، سەقز، بانە، ئورمیە، ماكۆ، مەهاباد ، تەنانەت چەند گروپێك لە تارانی پایتەختی ئێرانەوەش هاتوون و بەشدارییان كردووە، هەر گرووپێك بە موزیك و شێوازی جلوبەرگ و جۆری هەڵپەڕكێی شار و ناوچەكەی خۆی بەشدارن، ئەوەش جوانییەكی زیاتری بە فێستیڤاڵەكە داوە.


ڕابەر کورستانی ئاماژەی بەوەشكرد: ئەمساڵ تەنیا کوردانی خوراسان بەشدارییان لە فێستیڤاڵدا نەکردووە، بەڵام بۆ ساڵی داهاتوو بە دڵنیاییەوە هەوڵ دەدەین ئەوانیش بەشدار بن.