ژمارەی قوربانییانی ئاگرکەوتنەوەکەی هۆنگ کۆنگ بۆ 128 کەس بەرزبووەوە

ئاڤا نیوز

ئاماری قوربانییانی ئەو ئاگرە گەورەیەی ڕۆژی چوارشەممە کۆمەڵگەیەکی نیشتەجێبوونی لە هۆن کۆنگ گرتەوە، بۆ زیاتر لە 100 کەس بەرزبووەتەوە.

لێدوانی فەرمی: کریس تانگ، بەرپرسی دەزگای ئاسایشی هۆنگ کۆنگ ڕایگەیاند، ژمارەی ئەو کەسانەی بەهۆی ئاگرەکەوە گیانیان لەدەستداوە بۆ 128 کەس بەرزبووەوە. 

تیمەکانی فریاگوزاری و ئاسایشی شاری هۆنگ کۆنگ بە ڕۆژنامەنووسانیان ڕاگەیاندووە، جگە لەو ژمارە زۆرەی گیانلەدەستدان، 79 کەسی دیکەش برینداربوون و 200 کەسی دیکەش بێسەروشوێنن. هەروەها ئاماژەیان بەوە کردووە تا ئێستا ناسنامەی 89 کەس لە قوربانییەکان نەناسراوەتەوە.

باکگراوند: ئاگرەکە ڕۆژی چوارشەممە لە کۆمەڵگەیەکی نیشتەجێبوونی شاری هۆنگ کۆنگ کەوتەوە، بەهۆیەوە حەوت تاوەری نیشتەجێبوونی کۆمەڵگەکەی گرتەوە.