گەنجێکی خورماڵ دارتوویەکی 70 ساڵە دەکات بە ژووری دانیشتن

ئاڤا نیوز

لە ناحیەی خورماڵ، گەنجێک بە بیرۆکەیەکی ناوازە، دارتوویەکی 70 ساڵەی کردووەتە ژوورێکی دانیشتنی تەختە، بەبێ ئەوەی هیچ زیانێک بە دارەکە بگەیەنێت یان سروشتەکەی تێک بدات.

چیرۆکی سەرەکی: ڕێناس محەممەد، گەنجێکی ناحیەی خوڕماڵە، دارتوویەک کە دەکەوێتە ناو باخی ماڵەکەیانەوە و بەرزییەکەی نزیکەی پێنج مەترە، ژوورێکی 2.5 بە 5 مەتری لەسەر دروستکردووە، بێ ئەوەی دەستکاری پێکهاتەی دارەکەی کردبێت؛ لق و گەڵاکان وەک خۆیان لە گەشەکردندان و بوونەتە بەشێک لە دیکۆری خانووەکە، هەروەها قەدی درەختەکە بە گوڵە لاولاوی سروشتی ڕازێنراوەتەوە.

لێدوانی فەرمی: ڕێناس محەمەد، خاوەنی بیرۆکەکە بە ئاڤای وت: "سەرەڕای ئەوەی تووەکە بێ بەرە، بەڵام نەمدەویست بیبڕمەوە، بۆیە بڕیارمدا بەم شێوازە سوودی لێ ببینم و گیانی بە بەردا بکەمەوە."

ئاماژەی بەوە کرد کە شوێنەکە بووەتە پەناگەیەکی ئارام بۆ کاتە جیاوازەکان و پێشوازیکردن لە میوان و هاوڕێیان.