پلاندانانی عێراق: ڕێژەی هەڵئاوسان لە مانگی ڕابردوودا کەمیکردووە

ئاڤا نیوز

وەزارەتی پلاندانانی عێراق ڕایدەگەیێنێت، ڕێژەی هەڵئاوسانی مانگانە و ساڵانە لە مانگی 10ـی ڕابردوودا بە بەراورد بە مانگەکانی پێشوو کەمتر بووەتەوە.

لێدوانی فەرمی: عەبدولزەهرە هینداوی، وتەبێژی وەزارەتەکە، بە ئاژانسی فەرمی عێراقی ڕاگەیاند، تیمەکانیان لە ڕێگەی گەڕان و بەدواداچوونەوە بۆیان دەرکەوتووە کە نرخی شتومەک لە مانگی 10ـدا بە ڕێژەی 0.3% کەمیکردووە، بە بەراورد بە مانگی 9. هەروەها، بە بەراورد بە مانگی 10ـی ساڵی 2024، نرخەکان بە گشتی 0.5% دابەزیون.

پێدراوە ڕاستەکان: بەگوتەی هینداوی "ئەم کەمبوونەوەیە بە زۆری بەهۆی دابەزینی نرخی خۆراک و خواردنەوەکانەوە بووە بە ڕێژەی 0.5%". بەتایبەت، نرخی ماسی بە ڕێژەی 4.9% و میوە بە ڕێژەی 2.4% کەمیکردووە.

ئەوەی پێویستە بیزانیت: نرخی خانوبەرەش بە ڕێژەی 1% دابەزیوە. گوتەبێژەکە ئاماژەی بەوەشدا، نرخی هەندێک کاڵای دیکە کەمێک گۆڕانی بەسەردا هاتووە (هەندێکی بەرز بووەتەوە و هەندێکی دابەزیوە)، بەڵام زۆربەی شتومەکەکان نرخەکانی پێشوویان پاراستووە.