شاندی دانوستانکاری پارتی و یەکێتی کۆدەبنەوە

ئاڤا نیوز

بڕیارە سەرەتای ئەم هەفتەیە هەردوو شاندی دانوستانکاری پارتی دیموکراتی کوردستان و یەکێتی نیشتمانی کوردستان، لەسەر پرسی پێکهێنانی کابینەی نوێی حکومەتی هەرێمی کوردستان کۆببنەوە.

وێنە گەورەکە: پارتی و یەکێتی بەمەبەستی پێكهێنانی کابینەی نوێی حکومەتی هەرێمی کوردستان، پێشتریش چەند جارێکی کۆبوونەتەوە و تاوەکو ئێستا لەسەر چەند خاڵێکی هاوبەش ڕێککەوتن، ئەوەی ماوەتەوە گفتوگۆکردنە لەسەر دابەشکردنی پۆستەکان.

لێدوانی فەرمی: چیا هەرکی، یاریدەدەری مەکتەبی ڕێکخستنی پارتی دیموکراتی کوردستان لە هەولێر بە ئاڤا میدیای ڕایگەیاند: ئەم هەفتەیە شاندی دانوستانکاری پارتی سەردانی بۆ لای لایەنە سیاسییەکانی کوردستان دەستپێدەکاتەوە، لەو چوارچێوەیەشدا ڕۆژی دووشەممە سەردانی یەکێتی نیشتمانی کوردستان دەکات.


بەشێک لە قسەکانی چیا هەرکی لەبارەی کۆبوونەوەی  پارتی و یەکێتی:

-شاندی پارتی لە هۆشیار زێباری، پشتیوان سادق، عەلی حوسێن پێکهاتوون، ئەگەر هەیە ئەندامی دیکە بۆ شاندەکە زیاد بکرێن.

-شاندی پارتی لەگەڵ شاندی یەکێتی گفتوگۆ لەسەر پرسی دابەشکردنی پۆستەکانی کابینەی نوێی حکومەتی هەرێمی کوردستان دەکات.

- ئەو کارنامەیەی پێشتر بۆ پێکهێنانی حکومەت هەردوولا لەسەری ڕێککەوتبوون وەکو خۆی دەمێنێتەوە.

- گفتوگۆی پارتی لەگەڵ لایەنەکان و لەگەڵ یەکێتیش هەم لەسەر پرسی پێکهێنانی حکومەتی هەرێمی کوردستان، هەم پێکهێنانی حکومەتی عێراق دەبێت.