مانەوەی فڕۆکەیەک بۆ چەندین ساڵ لە بیابانەکانی باشووری عێراق مشتوومڕی لێدەکەوێتەوە

ئاڤا نیوز

لە وێنەی مانگی دەستکرد و نەخشەی گۆگڵ، فڕۆکەیەکی مەدەنی لەبیابانەکانی نێوان هەردوو پارێزگای زیقار و موسەننا لە باشووری عێراق دەبینرێت کە لە نەخشەکانی دوای ساڵی 2021ەوە دەرکەوتووە، ئەوەش مشتوومڕی لە تۆڕە کۆمەڵایەتییەکان دروستکردووە، بەتایبەتیش کە ئەو ناوچەیە هیچ شوێنێکی نیشتنەوەی فڕۆکەی لێ نییە.

ئەوەی پێویستە بیزانیت: توێژەران و ئەوانەی تایبەتمەندن بە فڕۆکەوانی دەڵێن، لە کاتی گەڕان بۆ شارۆچکەی مێژوویی وەرکا لە پارێزگای موسەننا، وێنەی فڕۆکەیەکی مەدەنی نیشان دەدات و نازانرێت ئەو فڕۆکەیە بۆچی لەو شوێنە دەردەکەوێت، شێوەی فڕۆکەکە لە فڕۆکەی ئێرباس a320 دەچێت و پێش 30ی نیسانی ساڵی 2021 لەو شوێنەدا نەبووە.

ئەوەی لەبارەیەوە دەگوترێت: شارەزایانی بواری فڕۆکەوانی ئاماژە بەوەدەکەن، بوونی ئەو فڕۆکەیە چەند گریمانەیەکە هەڵدەگرێت ئەوانیش بریتین لە: یەکەم ئەوەیە فڕۆکەکە تێکشکاوە بەڵام لەلایەن حکومەتی عێراقەوە ئاشکرا نەکراوە، یان فڕۆکەکە خۆی تێکچووە و بە وشکانیدا بۆ ئەو شوێنە گوازراوەتەوە بۆ مەبەستی بەکارهێنانی وەک شوێنی مانەوە یان کۆگاکردن چونکە لەپێشتریشدا ڕووداوی هاوشێوە هەبووە، یانیش لەوانەیە فڕۆکەکە بە مەبەست لەو شوێنە دانرابێت بۆ مەبەستی سەربازی، فێربوون و ڕاهێنان.

گۆشەیەکی دیکەی دیمەنەکە: گریمانەیەکی دیکەش کە بەشێک لە شارەزایان باسی دەکەن، ئەویش ئەوەیە بابەتە سادەیە و ئاڵۆزکردن هەڵناگرێت، چونکە وێنەکە لەکاتی فڕینی فڕۆکەکە بەسەر بیابانەکانی باشووری عێراقدا گیراوە و وادەردەکەوێت لەسەر زەوی بێت، بەڵام فڕۆکەکە لە فڕیندا بووە و بەرەو شوێنی مەبەست بەبێ کێشە لە گەشتی ئاسایی خۆیدا بووە.