وەزارەتی کارەبا: ئەمشەو دۆخی کارەبا بەرەو ئاسایی بوونەوە دەچێت

ئاڤا نیوز

هاونیشتمانییانی هەرێمی کوردستان دووبارە کارەبای 24 کاتژمێری دەگەڕێتەوە بۆ ماڵەکانیان، سەرچاوەیەک لە وەزارەتی کارەباش بە ئاڤای ڕاگەیاند: ئەمشەو دۆخی کارەبا بەرەو ئاسایبوونەوە دەچێت. 

وێنە گەورەکە: بە هۆی ‌هێرشی مووشەکی بۆ سەر کێڵگەی غازی کۆرمۆر لە ڕۆژی چوارشەممەوە هاووڵاتییانی هەرێمی کوردستان بێ بەشبوون لە کارەبای 24 کاتژمێر، هەوڵەکانی حکومەتی هەرێمی کوردستانیش بۆ چارەسەرکردنی ئەو دۆخە بەردەوامە.

زانیاریی تایبەت: لەبارەی ئاسایبوونەوەی پێدانی کارەبای نیشتمانی سەرچاوەیەک لە وەزارەتی کارەبا بە ئاڤای ڕاگەیاند: ئەمشەو دۆخی کارەبا بەرەو ئاسایی بوونەوە دەچێت و دووبارە کارەبای 24 کاتژمێری بۆ هەرێمی کوردستان دابیندەکرێتەوە. 

زانیاریی پەیامنێر: هیشام سەعید، پەیامنێری ئاڤا لە هەولێر ڕایگەیاند: لە کۆنترۆڵی کارەبای هەرێمەوە قۆناغ بە قۆناغ کارەبای پڕۆژەی ڕووناکی بۆ شارەکانی هەرێمی کوردستان دەگێڕدرێتەوە و ئێستا بەشێک لە شارەکان کارەبایان بووەتەوە بە 24 کاتژمێری و تا کاتژمێر 12ـی نیوەڕۆی ئەمڕۆ پێدانی کارەبا دەگەڕێتەوە دۆخی ئاسایی.