وەزارەتی ناوخۆ: کەسانێکی ئاژاوەگێڕ تەقەیان بە سەر خەڵک و ڕێبوارانی ڕێگای گوێڕ - هەولێر کرد

ئاڤا نیوز

لەبارەی گرژییەکەی سەر رێگای گوێڕ - هەولێر، وەزارەتی ناوخۆی حکومەتی هەرێمی کوردستان ڕاگەیێنراوێکی بڵاوکردەوە و ئەو کارەی بە ئاژاوەگێڕی ناوبرد و ڕایگەیاندووە، سنوورێک بۆ ئەو کارە تێکدەرانە دادەندرێت.

چیرۆکی سەرەکی: ماوەی چەند ڕۆژێکە هاووڵاتییانی گوندی لاجان ڕێگەی گوێڕ - هەولێریان داخستووە و ڕێگە بە هاتووچۆی ئۆتۆمبێلی کۆمپانیایەک نادەن، بە هۆیەوە گرژی و ئاڵۆزی دروست بووە، لە ئەنجامدا پێشمەرگەیەک و چەند هاووڵاتییەکی دیکە برینداربوون. 

ڕاگەیێنراوی فەرمی: وەزارەتی ناوخۆی حکومەتی هەرێمی کوردستان بڵاوی کردەوە، ماوەیەکە لەلایەن چەند دەستێکی دەرەکی و بە فیتی هەندێک کەس و لایەنی ناوخۆیی، هەوڵی نانەوەی ئاژاوە دەدرێت، بە هاندانی ناوخۆیی و دەرەکی، کۆمەڵە کەسێکی ئاژاوەگێڕ رێگای تانکەرەکانی گواستنەوەی سووتەمەنی و هاووڵاتیانیان لە سنووری گوێڕ گرت و تەقەیان بە سەر خەڵک و ڕێبوارانی ئەو ڕێگایەدا کرد، لە ئەنجامی تەقەی ئەو کەسانەدا هاووڵاتییەک بووە قوربانی و گیانی لە دەستدا و ژمارەیەک کەسی تریش بریندار بوون. 

زانیاریی زیاتر: هەر لە ڕاگەیێنراوەکەی وەزارەتی ناوخۆدا هاتووە، چیتر رێگە نادەین سوود لە نیازپاکیی دامو دەزگاکانی هەرێمی کوردستان وەربگێرێت و سنوورێک بۆ ئەو کارە تێکدەرانە دادەندرێت. بۆ ڕاگرتنی ئەو جۆرە ئاژاوەگێڕییانە، بە پێی یاسا بەرکارەکان لە هەرێمی کوردستان مامەڵە لەگەڵ کەسانی ئاژاوەگێڕ دەکرێت و کەس لە سەرووی یاسا نییە.

بەتەنیش ئەم بابەتەوە: وەزارەتی ناوخۆی حکومەتی هەرێمی کوردستان، بەئامانجگرتنی کێڵگەی غازی کۆرمۆیش بە هەوڵێکی تێکدەرانە و تیرۆریستی دەزانێت کە مەبەست لێی ڕاگرتنی بەرهەمهێنانی کارەبای هەرێم بووە.

باسیش لەوە کراوە، حکومەتی هەرێمی کوردستان سووتەمەنیی شلی وەک جێگرەوەی غاز بۆ دابین کردنی کارەبا بەکارهێنا و کێشەی کوژانەوەی کارەبای لە هەرێمی کوردستان چارەسەرکرد.

نوێ دەکرێتەوە..