یەکەمین پێشانگای لۆجستیک بۆ گواستنەوە و گەیاندن لە هەولێر دەکرێتەوە

ئاڤا نیوز

بڕیارە یەکەم پێشانگای لۆجستی بۆ گواستنەوە و گەیاندن لە هەولێر بکرێتەوە و دەیان کۆمپانیای ناوخۆیی و جیهانی لە پێشانگاکە بەشدار دەبن.

لێدوانی فەرمی: گەیلان سەعید، سەرۆکی ژووری بازرگانی هەولێر بە ئاڤای ڕاگەیاند: ئامادەکارییەکان بەردەوامن بۆ تۆمارکردنی کۆمپانیا ناوخۆیی و بیانییەکان. ئامانجی پێشانگاکە ئەوەیە هەولێر وەک ناوەندێکی بازرگانی بناسێنین و دروستکردنی پەیوەندی لەنێوان کۆمپانیا ناوخۆیی و بیانییەکان لەبوای گواستنەوە و گەیاندن هەبێت.

گەیلان سەعید دەشڵێت: وێڕای ئەوەی کۆمپانیایەکی گەورەی بواری گواستنەوە و گەیاندنی چینی ئامادەیی دەربڕیووە بەشداری بکات، هەردوو گەورە کۆمپانیای بەندەری مێرسین و ئەسکەندەروونە بانگهێشت کراون. هەر کۆمپانییایەك لە رێگای ژووری بازرگانی و پیشەسازی هەولێر بەشدار بێت 25٪ داشکانی بۆ دەکرێ و هانی کۆمپانیاکان دەدەین لەم ئیڤێنتە گرینگە بەشدار بن.

زانیاریی زیاتر: پێشانگاکە لەناوەڕاستی مانگی 12 لە هۆڵی نێودەوڵەتیی پێشانگاکان لە پارکی سامی عەبدولڕەحمان بەڕێوە دەچێت. لەلایەن CARGO EVENT سەرپەرشتی دەکرێت و بەهاوکاری ژووری بازرگانی و پیشەسازی هەولێر دەبێت.

- لە پێشانگاکە کۆمپانیاکانی کۆمپانیاکانی پۆستە و گەیاندن، کۆمپانیاکانی دروستکردنی کۆگ و مەوادی ناو کۆگا، کۆمپانیاکانی کرێن و بەرزکەرەوە، بانکەکان، کۆمپانیاکانی دڵنیایی و کۆمپانیاکانی تەکنەلۆجیای پەیوەندار بەشدار دەبن.

ئەوەی پێویستە بیزانیت: ئەمساڵ لە شاری هەولێر 12 پێشانگای گەورەی نێودەوڵەتیی جۆراوجۆر لە بواری جیاواز کراونەتەوە.

بۆچی گرنگە: ئەم پێشانگایانە هۆکارێکی کاریگەرن بۆ جوڵەی بازرگانی و دروستکردنی پەیوەندی لە نێوان کۆمپانیا ناوخۆیی و بیانییەکان.