گفتوگۆکان بۆ دیاریکردنی کاندیدی سەرۆکوەزیرانی عێراق "بەکاتی ڕاگیران"

ئاڤا نیوز

هەرچەندە چوارچێوەی هەماهەنگی بانگەشەی ئەوەی دەکرد کە لەگەڵ پەسەندکردنی ئەنجامەکانی هەڵبژاردن لەلایەن دادگای فیدڕاڵییەوە، کاندیدی خۆی بۆ پۆستی سەرۆکوەزیران ڕادەگەیێنێت، ئێستا ئەم هاوپەیمانێتییە کە خاوەنی گەورەترین فراکسیۆنی پەرلەمانە، کاندیدی خۆی بۆ پۆستی سەرۆکوەزیران بۆ یەکلانابێتەوە و "بەکاتیش گفتوگۆکانی لەوبارەیەوە ڕاگرتووە."

وێنە گەورەکە: چاوەڕێ دەکرێت تاوەکو کۆتایی مانگی داهاتوو سەرجەم ڕێکارەکانی پەیوەست بە هەڵبژاردن تەواوبکرێن و دادگای فیدراڵیش ناوی کاندیدە براوەکانی خولی شەشەمی پەرلەمانی عێراق پەسەند بکات، لە هەنگاوی دواتریشدا سەرۆکی پەرلەمان لە پشکی سووننەکان و سەرۆککۆمار لە پشکی کورد هەڵدەبژێردرێت، دواتریش سەرۆککۆمار کاندیدی گەورەترین فراکسیۆنی پەرلەمان بۆ پێکهێنانی حکومەت ڕادەسپێرێت.

زانیاریی بەدەستهاتوو: سەرچاوەیەک لە چوارچێوەی هەماهەنگی شیعەکان بە ڕۆژنامەی شەرق ئەلئەوستی سعودی ڕاگەیاندووە، هاوپەیمانێتییەکەیان بەشێوەیەکی کاتی گفتوگۆکانی بۆ دیاریکردنی کاندیدی سەرۆکوەزیران ڕاگرتووە، هۆکارەکەشی بۆ قورسی ڕێککەوتن لەسەر کاندیدێک دەگەڕێتەوە کە جێگەی ڕەزامەندی هەمووان بێت، چاوەڕێکردنی هەڵوێستی ئەمریکاش لەسەر ئەم بابەتە هۆکارێکی دیکەی ڕاگرتنی گفتوگۆکانە.

ئەوەشی خستووەتەڕوو، ئێستا چاوەڕێی ئەو پەیامەن کە یاریدەدەری وەزیری دەرەوەی ئەمریکا یان نێردەی ترەمپ بۆ عێراق لەگەڵ هاتنیان بۆ عێراق دەیگەێنن. پێشتریش سەرکردەکانی چوارچێوەی هەماهەنگی باسیان لەوەکردبوو دەیانەوێت کاندیدی سەرۆکوەزیران هاوسەنگ بێت لەنێوان قبووڵکردنی لەئاستی ناوخۆ و لە ئاستی نێودەوڵەتی.

لەبارەی کاندیدەکانی سەرۆکوەزیرانیش، سەرچاوەیەکی دیکە بە ڕۆژنامەکەی ڕاگەیاندووە، ئەو ژمارە زۆرەی کاندیدی سەرۆکوەزیران کە باس دەکرێن بەهیچ شێوەیەک ڕاست نین و لیستی کاندیدەکان زۆر سنوردارن، لەناویشیاندا هیچ وەزیر و بەرپرسێکی پێشووی ئەمنیی تێدا نییە، هەروەها هیچ کەسێکی دیکەشی تێدا نییە کە بە گەندەڵی دارایی و کارگێڕیی تۆمەتبارکراون.

ئەوەی لەبارەیەوە دەگوترێت: ڕۆژنامەکە دەڵێت، لەناو لیستی کاندیدەکانی چوارچێوەی هەماهەنگی بۆ پۆستی سەرۆکوەزیران، ناوی هەریەکە لە محەممەد شیاع سوودانی سەرۆکوەزیرانی ئێستا، نووری مالیکی و حەیدەر عەبادی، هەردوو سەرۆکوەزیرانی پێشووتری عێراق هەن، هەریەکە لە قاسم ئەعرەجی ڕاوێژکاری ئاسایشی نەتەوەیی، حەمید شەتڕی سەرۆکی دەزگای هەواڵگری و عەبدولئەمیر شەمەری وەزیری ئێستای ناوخۆی عێراقیش، ناوی بۆ وەرگرتنی پۆستەکە پێشنیاز کراوە.