یەکەم شەپۆلی بارانبارین جوتیارانی گەرمیان دەخاتەوە جوڵە

ئاڤا نیوز

 

بەهۆی دابارینی یەکەم شەپۆلی بارانی پاییزە، جوڵە کەوتووەتەوە ناو کەرتی کشتوکاڵی لە دەڤەری گەرمیان و جوتیاران بە ئومێدی قەرەبووکردنەوەی زیانەکانی ساڵی ڕابردوو، دەستیان بە کێڵان و تۆوکردنی زەوییەکانیان کردووەتەوە.

 

بەدواداچوونی ئاڤا: بەپێی بەدواداچوونەکانی ئاڤا، دواکەوتنی باران و وشکەساڵی لە ساڵی ڕابردوودا زیانێکی ماددی گەورەی بە جووتیارانی ناوچەکە گەیاندووە، بەڵام بارانبارینی ئەم دواییە هیوایەکی نوێی پێ بەخشیون.

مام ئیبراهیم، جوتیارێکی بە ئەزموونی گوندی "تازەدێ"یە و 41 ساڵە لە بواری کشتوکاڵدا کار دەکات. ئەو ئاماژە بەوە دەکات کە ساڵی ڕابردوو بەهۆی کەمبارانییەوە نزیکەی 20 ملیۆن دینار زەرەری کردووە.

مام ئیبراهیم دەڵێت: "دوای یەکەم بارانی ئەمساڵ، دەستم بە کێڵان و تۆوکردنی زەوییەکەم کردووەتەوە و بەهیوام بەرهەمی ئەمساڵ قەرەبووی زیانەکانی پارم بۆ بکاتەوە."

 

لەلایەکی دیکەوە، فاغری جووتیار کە 25 ساڵە بێ دابڕان گەنم دەچێنێت، دەڵێت: "ڕاستە ساڵی پار دڵخۆشکەر نەبوو، بەڵام یەکەم بارانی ئەمساڵ شەوق و زەوقێکی دیکەی پێداوین بۆ ئەوەی بەردەوام بین."

زانیاریی زیاتر: بەپێی ئامارەکانی بەڕێوەبەرایەتی کشتوکاڵی گەرمیان، لە سنووری ئیدارەکەدا ملیۆنێک و 432 هەزار دۆنم زەوی کشتوکاڵی هەیە. لەو ڕێژەیە ملیۆنێک و 322 هەزار دۆنمیان بە شێوازی دێمەکارین و بۆ بەرهەمهێنان بەتەواوی پشت بە باران دەبەستن. شارەزایان ئاماژە بەوە دەکەن کە بۆ دەستکەوتنی بەرهەمێکی باش، ناوچەکە پێویستی بە بڕی 250 ملیم بارانە.

 

سەبارەت بە بەرهەمی گەنم، ئامارەکان دەریدەخەن کە ساڵانە بەرهەمی گەنم لە گەرمیان سەرووی 150 هەزار تۆنە، بەڵام ساڵی ڕابردوو بەهۆی وشکەساڵییەوە ئەم بەرهەمە بۆ نیوە دابەزیوە.

 

لێدوانی فەرمی: سەبارەت بە بڕی بارانبارینی ئەمساڵ، ستار عەلی، وتەبێژی کشتوکاڵی گەرمیان ڕایگەیاند: "تا ئەم ساتە لە کەلار 32 ملیم، لە کفری 22 ملیم، لە مەیدان 63 ملیم و لە ناحیەی شێخ تەویل 66 ملیم باران باریوە."

 

وتەبێژەکەی کشتوکاڵی گەرمیان جەختی لەوە کردەوە کە ئەم بڕە بارانە بۆ قۆناغی سەرەتای وەشاندن و سەوزبوونی تۆو بەسە و گونجاوە، ئەمەش هاندەرێکی باشە بۆ جوتیاران تا دەست بە وەرزێکی نوێی چاندن بکەن.