کارەساتێکی ژینگەیی لە دیجلە؛ ئاوەڕۆی ماڵان و کارگەکان ڕووبارەکە دەخنکێنن

ئاڤا نیوز

 

یەکێک لەو 18ڕێڕەوە ئاوییەی دەڕژێتە نێو ڕووباری دیجلەوە، بەهۆی پیسبوونی تەواوەتییەوە ڕەنگی بۆ ڕەش گۆڕاوە و بووەتە سەرچاوەی بڵاوبوونەوەی نەخۆشی و مەترسی بۆ سەر ژیانی دانیشتووانی ناوچەکە.

 

چیرۆکی سەرەکی: بەپێی بەدواداچوونەکانی ئاڤا، ئەم ڕێڕەوە کە پێکهاتەکەی تەنها بریتییە لە پاشماوەی ماڵان و کارگەکان، لەگەڵ تێکەڵبوونی بە ڕووباری دیجلە، تەواوی خاسیەتە خاوێنەکانی ئاوەکە لەناودەبات و دەیکاتە ژینگەیەکی لەبار بۆ گەشەکردنی ڤایرۆس و بەکتریاکان. توێژێکی ئەستوور لە پاشماوەی ئاوەڕۆ، پلاستیک و ماددە ڕەقەکان ڕووی ئاوەکەی داپۆشیوە و بەهۆی کارلێکی کیمیایی نێوان ئەم ماددانە، گاز و بۆنێکی مەترسیدار بە ژینگەدا بڵاودەبێتەوە.

دانیشتووانی ناوچەکە نەک هەر ناتوانن سوود لە ئاوەکە وەربگرن، بەڵکو ناچارن بەرگەی بۆن و دیمەنە نەخوازراوەکەشی بگرن. دایکی ئەحمەد، ژنێکی دانیشتووی ناوچەکەیە و بە نیگەرانییەوە بە ئاڤای گوت: "ئەمەی لە ڕووباری دیالەوە دێت هەمووی ئاوەڕۆیە، بۆنەکەی ئێمە و منداڵەکانمانی کوشتووە. ئێمە نازانین مرۆڤین یان ئاژەڵ؟"

ئەو هاوڵاتییە داوا لە بەرپرسان دەکات ئاوڕیان لێ بدەنەوە و دەڵێت: "ئەوانەی لە کۆشک و تەلارەکان دەژین با کەمێک بەزەییان هەبێت، پیسایی و بۆنی ناخۆش هەراسانی کردووین، ئەگەر ناتوانن چارەسەری بکەن، هیچ نەبێت ئاوی خواردنەوەمان بۆ دابین بکەن."

زانیاریی زیاتر: پیسبوونی ئاوەکە گەیشتووەتە ئاستێک کە هیچ گیاندارێک ناتوانێت تێیدا بژی. عەمار سەڵاح، هاوڵاتییەکی دیکەی ناوچەکەیە و ئاماژە بەوە دەکات کە بەهۆی بۆنی ئەم ڕووبارەوە خەڵکی تووشی نەخۆشی بوون، بەتایبەت لە سەردەمی کۆرۆنا کاریگەرییەکانی زیاتر دەرکەوتووە.

عەمار دەڵێت: "ئاوەکە هێندە پیسە ناتوانین لێی نزیک ببینەوە، ماسی تێدا ناژی و ئاژەڵیش لێی ناخواتەوە، ئێمە لێرە لە دۆزەخدا دەژین."

ئامارەکان: بەپێی ڕاپۆرتی لایەنە پەیوەندیدارەکانی عێراق، ڕۆژانە بڕی 500 هەزار بۆ یەک ملیۆن مەتر سێجا ئاوەڕۆی ماڵان و کارگەکان دەڕژێنە نێو ڕووباری دیجلەوە. مەزندە دەکرێت لە هەر چرکەیەکدا 43 هەزار لیتر ئاوەڕۆی ناتەندروست تێکەڵ بە ئاوی خاوێنی ڕووبارەکە ببێت، کە ئەمەش هەڕەشەیەکی جددییە بۆ سەر ئاسایشی ئاو و تەندروستیی گشتی لە عێراقدا.