كورسیی خوێندنی زانكۆ بۆ 30 سزادراوی گرتووخانەی هەولێر دابین دەكرێت

ئاڤا نیوز

بەڕێوەبەرایەتیی چاكسازیی گەورانی هەولێر، یاداشتێكی لێکتێگەیشتن لەگەڵ زانكۆیەك واژۆ دەكات؛ كە بەهۆیەوە 30 سزادراوی گرتووخانەی هەولێر بۆ خوێندنی ئەمساڵ وەربگیرێن.

چیرۆكی سەرەكی: شاندێكی بەڕێوەبەرایەتیی چاكسازیی گەورانی هەولێر، بەسەرپەرشتی مقەدەمی مافپەروەر، ڕێباز زێوەر، بەڕێوەبەری چاكسازییەكە، سەردانی سەرۆكایەتیی زانكۆی نۆڵجیان لە شاری هەولێر کرد، لەلایەن پرۆفیسیۆر دكتۆر ئەحمەد دزەیی، سەرۆكی زانكۆ و بەڕێوەبەری بەشی  پەیوەندییەكان و ڕاگەیاندن، پێشوازییان لێكرا.

لێدوانی فەرمی: ئاریان ئەحمەد، وتەبێژی وەزارەتی كارو كاروباری كۆمەڵایەتیی حكومەتی هەرێمی كوردستان ڕایگەیاند، یاداشتێكی لێكتێگەیشتن لەنێوان بەڕێوەبەرایەتیی چاكسازیی گەورانی هەولێر و زانكۆی نۆڵج واژۆكرا، بەپێی ڕێككەوتنەكە؛ ئەمساڵ 30 سزادراو بۆ خوێندن وەربگیرێن، ساڵانی داهاتووش ژمارەی وەرگیرانی سزادراوان كراوە دەبێت.