هێزەکانی ئەمریکا و سووریا لە ئۆپەراسیۆنێکی هاوبەشدا گورزێکی گەورە لە داعش دەدەن

ئاڤا نیوز

هێزەکانی ئەمریکا و وەزارەتی ناوخۆی سووریا لە ئۆپەراسیۆنێکی هاوبەشدا چەندین حەشارگەی ڕێکخراوی داعشیان لەناوبردووە.

بڵاوکراوەی فەرمی: فەرماندەیی ناوەندیی سوپای ئەمەریکا ڕایگەیاند، هێزەکانیان بە هاوبەشی لەگەڵ هێزە ئەمنییەکانی سووریا، لە ناوچەکانی باشووری ئەو وڵاتە دەستیان بەسەر بڕێکی زۆر چەک و تەقەمەنیی داعشدا گرتووە و لەناویان بردوون.

فەرماندەی ناوەندی ئەمریکا دەڵێت، ئەم ئۆپەراسیۆنە وەک بەشێک لە هەوڵە بەردەوامەکانیانە بۆ ڕێگریکردن لە خۆڕێکخستنەوەی پاشماوەکانی داعش و نەهێشتنی توانای سەربازییان لە ناوچەکەدا.

زانیاریی زیاتر: ئۆپەراسیۆنەکان لە نێوان ڕۆژانی 24 بۆ 27ـی مانگی 11 ئەنجام دراون و لەو ماوەیەدا، هێزەکانی هاوپەیمانی نێودەوڵەتی دژ بە داعش بە هەماهەنگی و هاوکاریی هێزەکانی وەزارەتی ناوخۆی سووریا، توانیویانە شوێنی زیاتر لە 15 حەشارگە و کۆگای نهێنیی چەکی ڕێکخراوی داعش دەستنیشان بکەن و لەناویان ببەن.

ئەمەش بزانە: لە ئۆپەراسیۆنەکەدا زیاتر لە 130 هاوەن و مووشەک، چەندین چەک، دۆشکە، مینی دژەتانک و کەرەستەی دروستکردنی تەقەمەنی چێندراو لەناوبراون، هەروەها دەستیشگیراوە بەسەر ماددە هۆشبەرەکان و لەناویان بردوون.