پێدانی ئۆتۆمبێل بە قیست بۆ مامۆستایان دەست پێ دەكات

ئاڤا نیوز

سەرۆكی لقی هەولێری یەكێتیی مامۆستایانی كوردستان ڕایدەگەیێنێت، پێدانی ئۆتۆمبێل بە قیست بە مامۆستایان دەستپێدەكاتەوە، مامۆستایان لەئەمڕۆوە دەتوانن دەست بە مامەڵە بكەن.

چیرۆكی سەرەكی: دوای كۆبوونەوەی یەكێتی مامۆستایانی كوردستان لەگەڵ بەرپرسانی كۆمپانیای جیلی بۆ ئۆتۆمبێل، كۆمپانیاكە لە دەستپێشخەریێكدا ئۆفەرێكی خستووەتە بەردەم مامۆستایانی هەرێمی كوردستان، بەتایبەت ئەوانەی هەژماری بانكیان لە بانكی جیهان كردووەتەوە، دەتوانن لەڕێگەی ئەو كۆمپانیایەوە بە قیستی درێژخایەن ببنە خاوەنی ئۆتۆمبێل و ڕێژەی 8%ـیش داشكاندن لە نرخی ئۆتۆمبێلەكان دەكرێت و ژمارەی تابلۆی ئۆتۆمبێلیش بەخۆڕاییە.

لێدوانی فەرمی: عیسا حوسێن، سەرۆكی لقی هەولێری یەكێتی مامۆستایانی كوردستان، تایبەت بە ئاڤا ڕایگەیاند، دوای دانیشتنمان لەگەڵ نوێنەرانی كۆمپانیای جیلی، گەیشتینە لێكتێگەیشتن بە پێدانی ئۆتۆمبێل بە مامۆستایان بە قیستی 60 مانگ (پێنج ساڵ) و بە داشكاندنی 8% لە نرخەكەی، جگەلەوەش كەمكردنەوەی 400 هەزار دینار لە نرخی گشتیی ئۆتۆمبێلەكە و پێدانی تابلۆش بەخۆڕایی.

شێوازی جێبەجێکردن: سەرۆكی لقی هەولێری یەكێتی مامۆستایانی كوردستان ڕوونیكردەوە، ئەو مامۆستایانەی خوازیاری كڕینی ئۆتۆمبێلەكەن، مەرجە نووسراوی پشتگیریی یەكێتی مامۆستایان ببەن، لەگەڵ ئامادەكردنی دوو كەفیل كە یەكێكیان فەرمانبەری حكومی بێت.

ڕێککەوتنەکە بەم شێوەیە: پێشەكی بڕی پێنج ملیۆن دینار لە مامۆستایان وەردەگیرێت، قیستەكەش بە ماوەی پێنج ساڵ دەدرێت كە بەپێی نرخی ئۆتۆمبێلەكە، مانگانە لەنێوان 300 بۆ 340 هەزار دینار دەبێت.

ئەمەش بزانە: ئۆفەرەكە سەرەتا ئەو مامۆستایانە لێی سوودمەند دەبن كە ئەژماری بانكیان لە بانكی جیهان كردووەتەوە، دواتریش سەرجەم مامۆستایانی دیكە دەتوانن لێی سوودمەند بن.