هێڵی سێیەمی ئاوی دووکان – سلێمانی دەکەوێتە بواری جێبەجێکردن

ئاڤا نیوز

بەمەبەستی چارەسەری کێشەی کەمئاوی لە سلێمانی، پڕۆژەی هێڵی سێیەمی ئاوی دووکان – سلێمانی کەوتە بواری جێبەجێکردن و لەماوەی دوو مانگی داهاتوودا هێڵەکان ڕادەکێشرێن و کارە هونەرییەکانی دیکەی دەستپێدەکەن.

وێنە گەورەکە: بۆ دابینکردنی ئاوی سلێمانی ئێستا لەڕێگای دوو هێڵی ئاوی دووکان – سلێمانییەوە ئاو بۆ شارەکە دابیندەکرێت جگە لە سەرچاوەی ئاوی سەرچنار، بەڵام هێشتا بەشی پێداویستی ئاوی پاکی خواردنەوەی شارەکە ناکات، بۆ چارەسەری کێشەی کەمئاوی سلێمانیش حکومەتی هەرێمی کوردستان پڕۆژەی هێڵی سێیەمی دووکان – سلێمانی جێبەجێ دەکات، کە یەکێکە لە پڕۆژە گەورەکانی ئاو بۆ 30 ساڵی داهاتوو کێشەی ئاو لە سلێمانی چارەسەر دەکات.

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤا میدیای ڕاگەیاند، ئێستا پڕۆژەکە لە پرۆسەی یەکلایکردنەوەی زەوییەکانە، دواتر دیزاینی پڕۆژەکە دەکرێت لەماوەی دوو مانگی داهاتوو دەست کاروبارەکانی دیکە دەکرێت.

ئەمەش بزانە: تێچووی پڕۆژەی هێڵی سێیەمی ئاوی دووکان – سلێمانی 423 ملیۆن و 790 هەزار دۆلارە، کە بۆ ماوەی 30 ساڵی داهاتوو كێشەی كەمئاوی لە سلێمانی چارەسەر دەكات، ناوەڕاستی مانگی 10ـی ئەمساڵ گرێبەستەکە لەگەڵ كۆمپانیای جێبەجێكار واژۆ کرا.