ئەمریکا گەورەترین کونسوڵخانە لەسەر ئاستی جیهان لە هەولێر دەکاتەوە

ئاڤا نیوز

 

لە چوارچێوەی دیپلۆماسییەتی ئەمریکا لە عێراق و ڕۆژهەڵاتی ناوەڕاست و پەرەپێدان و جێبەجێکردنی سیاسەتی وەزارەتی دەرەوەی ئەمریکا و پەیوەندی و هاوبەشی لەگەڵ هەرێمی کوردستان، ئێوارەی ئەمڕۆ ئەمریکا گەورەترین کونسوڵخانەی خۆی لەسەر ئاستی جیهان لە شاری هەولێر دەکاتەوە. 

 

ئەوەی لەبارەیەوە دەگوترێت: سەرۆکوەزیران، مەسرور بارزانی، حەوت ڕۆژ پێش ئێستا و لە وەڵامی پرسیاری کوردستان حەسەن، پەیامنێری دیپلۆماسی ئاڤا گوتی: کردنەوەی گەورەترین کونسوڵخانەی ئەمریکا لە هەولێر، ئاماژەیەکی ڕوونە لەسەر هێز و ئەو پەیوەندییە باشەی لە نێوان هەرێمی کوردستان و ئەمریکادا هەیە، پەیوەندییەکی زۆرباش لە نێوانمان هەیە، هیوادارم بەردەوام بن لەوەی بتوانین زیاتر یارمەتی یەکتر بدەین، بۆ بەدیهێنانی ئامانجە هاوبەشەکانمان.

 

زانیاریی زیاتر: ئامادەکارییەکانی کردنەوەی کونسوڵخانەی نوێی ئەمریکا لە شاری هەولێر تەواو کراون، مایکل ڕیگاس، جێگری وەزیری دەرەوەی ئەمریکا و بەرپرسانی باڵای هەرێمی کوردستان لە کردنەوەی کونسوڵخانەکە بەشدار دەبن.

 

بابەتە ستراتییژییەکان: کردنەوەی گەورەترین کونسوڵخانەی ئەمریکا لە هەولێر، هەنگاوێکی گرنگە لە فراوانتر بوونی پەیوەندییەکانی هەرێمی کوردستان و هاوبەشی لەگەڵ وڵاتانی جیهان، بەتایبەت ئەمریکا.

 

کونسوڵخانەکە لە باڵەخانەیەکی سەرەکی و چەندین باڵەخانەی دیکە کە تایبەت دەکرێن بە مانەوەی کارمەندانی ئەمریکا پێکهاتووە، کونسوڵخانەکە کۆمەڵگەیەکی نیشتەجێبوون لەخۆدەگرێت کە هەموو پێداویستییەکانی ڕۆژانەی وەک یاریگا و مەلەوانگە و پارک، تەنانەت هۆتێلیشی تیایە، کونسوڵخانەکە هۆڵی لەشجوانی و چێشتخانە و بابەتەکانی دیکە کە چالاکی ڕۆژانە لەخۆدەگرێت.

 

سیستمی کارەبای کونسوڵخانەی نوێی ئەمریکا پشت بە وزەی خۆر دەبەستێت، زەوییەکەی بەشێوەیەک دیزاین کراوە کە بتوانرێت ئاوی باراناوی تیایدا گلبدرێتەوە و بۆ پێداویستییەکانی دانیشتوانەکەی بەکاربهێنرێتەوە، پێکهاتە و شێوازی دیزاینی باڵەخانە و خانووەکانی نێو کونسوڵخانە بەجۆرێکە کاریگەری تیشکی خۆر کەم دەکاتەوە و  پلەی گەرما تیایدا بە جێگیری دەمێنێتەوە.

 

باکگراوند: کونسوڵخانەی نوێی ئەمریکا لە هەولێر لە 6ـی تەممووزی 2018 بەردی بناغەی دانراوە، تێچووەکەی زیاتر لە 795 ملیۆن دۆلار بووە و لەسەر ڕووبەری 206 هەزار مەتر دووجا دروستکراوە.

 

ئەمەش بزانە: گەورەترین کونسوڵخانەکانی ئەمریکا لە جیهان ئەمانەن:
یەکەم: کونسوڵخانەی ئەمریکا لە هەولێر
دووەم: کونسوڵخانەی ئەمریکا لە ئیستەنبۆل
سێیەم: کونسوڵخانەی ئەمریکا لە فرانکفۆرت
چوارەم: کونسوڵخانەی ئەمریکا لە هۆنگ کۆنگ
پێنجەم: کونسوڵخانەی ئەمریکا لە دوبەی