لەبارەی بەکارهێنانی شەقامی 100 مەتریی سلێمانی هۆشداری بە شۆفێران دەدرێت

ئاڤا نیوز

 

قۆناغی یەکەمی شەقامی 100 مەتریی سلێمانی بە فەرمی کرایەوە، بەڕێوەبەرایەتیی هاتووچۆی سلێمانی داوا لە شۆفێران دەکات بە وریاییەوە مامەڵە لەگەڵ شەقامەکەدا بکەن، بەهۆی بەردەوامبوونی کارکردن تێیدا.

 

ڕاگەیێنراوی فەرمی: موقەدەم بەهمەن عەبدوڵڵا، وتەبێژی هاتووچۆی سلێمانی ڕایگەیاند، ئەم پڕۆژەیە گرنگییەکی زۆری هەیە بۆ کەم کردنەوەی قەرەباڵغی. شەقامەکە ئێستا بە هەردوو ئاراستەی کەرکوک – قەرەداغ – تانجەرۆ و بە پێچەوانەشەوە کراوەتەوە.

 

هاتووچۆی سلێمانی لە ڕاگەیێنراوەکەدا داوایەک لە شۆفێران دەکات و دەڵێت، ئەو ئۆتۆمبێلانەی لە تانجەرۆوە دێن، بەهۆی کارکردن لە پردی تاسڵوجە، پێویستە لە کۆتایی شەقامی 100 مەتری بچنە سەر شەقامی کەرکووک – سلێمانی و پاشان ئاراستەی خۆیان بۆ دەرچوون لە شار وەربگرن.

 

هەرچی شۆفێرانی بارهەڵگرە وەک هاتووچۆی سلێمانی دەڵێت، "دەتوانن شەقامی 100 مەتری بەکاربهێنن لەو ئاراستانەی دیاریکراون، ئەمەش یارمەتیدەر دەبێت بۆ کەم کردنەوەی قەرەباڵغی لەسەر شەقامەکانی ڕاپەڕین و بازنەیی مەلیک مەحمود.

 

زانیاریی زیاتر: هاتووچۆ جەخت لەسەر ئەوە دەکاتەوە کە بەهۆی بەردەوامبوونی کارکردن لە شەقامەکەدا، شۆفێران پێویستە بە وریاییەکی زۆرەوە لێبخوڕن.