وادەی وەرگرتنی مامەڵەی حەجخوازان درێژکرایەوە

ئاڤا نیوز

ئەمڕۆ دوایین وادەبوو بۆ ئەوانەى دەیانەوێت مامەڵەی بەجێگەیاندنی حەج لە ساڵی داهاتوو بکەن، سێ ڕۆژ  وەک هاوکاری درێژ کرایەوە، بۆ ئەوەی ئەو حەجخوازانەی ماون مامەڵەکانیان تەواو بکەن.

وێنە گەورەکە: ناوی چوار هەزار و 900 حەجخواز دەرچووە، بۆ بەجێگەیاندنی حەج لە ساڵی 2026، لەو ژمارەیە 700 کەس مامەڵەکانیان تەواو نەکردووە، تاوەکو کاتژمێر چواری ڕۆژی دووشەممە دەرفەتیان لەبەردەم بوو بۆ ئەوەی مامەڵەکانیان تەواو بکەن، بەڵام سێ ڕۆژی دیکە وادەکە درێژکرایەوە.

لێدوانی فەرمی: کاروان ستوونی، وتەبێژی بەڕێوەبەرایەتی حەج و عومرەی کوردستان بە ئاڤای گوت، "وادەکە تاوەکو ڕۆژی دووشەممە 08-12-2025 درێژکراوەتەوە، بۆ ئەوەی حەجخوازان مامەڵەکانیان تەواو بکەن بەپێچەوانەوە مافیان دەفەوتێت و تیروپشک کراوە هەزار و 250 کەسی یەدەگ هەیە بەپێی ڕیزبەندی لە شوێنیان دادەنرێن."

ئەمەش بزانە: ساڵی داهاتوو پێنج هەزار و 150 کەس لە هەرێمی کوردستان فەریزەی حەج بەجێدەگەیێنن، کە چوار هەزار و 900 کەس حەجخواز و 250 کەس فەرمانبەری کارگێڕی، حەملەدار، موفتی، پزیشک و ستافی پزیشکی، چێشتلێنەر، نانەوا و نوێنەر لەخۆدەگرێت.