سەدان مووچەخۆر لە سلێمانی مووچەی مانگی 9یان وەرنەگرتووە؛ دوو پێشنیاز دەخرێتە ڕوو

ئاڤا نیوز

 

 

چیرۆکی سەرەکی: سەدان مووچەخۆری مەدەنی و سەربازی لە سلێمانی، کە هەژماری مووچەیان لە بانکی ئەهلی عێراقی (یەکێک لە بانکەکانی پرۆژەی هەژماری من) کردووەتەوە، نەیانتوانیوە مووچەی مانگی نۆی خۆیان وەربگرن، نە بە کاش و نە بە دیجیتاڵی. کێشەکە لە دوای وەرگرتنەوەی کارتە بانکییەکانیان سەریهەڵداوە بە مەبەستی نوێکردنەوەیان، بەڵام بەشێکی زۆریان تا ئێستا کارتەکانیان پێنەدراوەتەوە.

 

ئەوەی پێویستە بیزانیت: فەتاح جەمال، یەکێک لەو مووچەخۆرانەی تووشی ئەم کێشەیە بووە، بە ئاڤای ڕاگەیاند: "دوو مانگ پێش ئێستا بانکەکە کارتەکانی لێ وەرگرتووینەتەوە و پێیوتین کێشەی هەیە و بۆتان نوێ دەکەینەوە، بەڵام بەشێکمان تاوەکو ئێستا کارتیان پێنەدراوەتەوە." مانگی ڕابردووش، دوای تێپەڕبوونی ماوەیەکی زۆر بەسەر دابەشکردنی مووچەدا، ناچار بە کاش مووچەیان وەرگرتووە.

 

بەدواداچوونی ئاڤا: پەیامنێری ئاڤا نیوز، چۆمان مەحموود، بەدواداچوونی بۆ ئەم بابەتە کردووە و لەگەڵ بانکی ناوبراو قسەی کردووە، بەڵام بانکەکە ڕەتیکردووەتەوە لەسەر ئەم بابەتە لێدوان بدات.

 

چارەسەرەکان: ئێستا بۆ چارەسەرکردنی ئەو کێشەیە دوو ڕێگە  پێشنیاز کراوە بۆ مووچەخۆران:

1. ناردنی ئیمەیڵ: مووچەخۆران دەتوانن ئیمەیڵێک بە زمانی عەرەبی بۆ لقی سەرەکی بانکی ئەهلی عێراقی لە بەغدا بنێرن. ئەم ڕێگەیە بە پڕ گرفت دادەنرێت چونکە زۆرێک لە فەرمانبەران، بە تایبەت خانەنشینان، ئیمەیڵیان نییە.

2. سەردانیکردنی لقی سلێمانی: مووچەخۆران دەتوانن سەردانی لقی سلێمانی بانکەکە بکەن و مامەڵە بکەن، کە پێشبینی دەکرێت دوو بۆ سێ ڕۆژی پێبچێت.

    

لێدوانی فەرمی: تیمی پرۆژەی هەژماری من بە ئاڤای گوت، پەیوەندییان بە بانکەکەوە کردووە و پێیان ڕاگەیاندوون کە بەشێک لەو کارتانە کێشەی تەکنیکییان هەبووە، بۆیە وەرگیراونەتەوە بۆ چارەسەرکردن. داوایان لە مووچەخۆران کردووە ڕاستەوخۆ لەگەڵ بانکەکە قسە بکەن، چونکە ڕەنگە ئێستا کارتی بەشی زۆریان چارەسەر کرابێت.

 

تیمی "هەژماری من" جەختیان لەوە کردووەتەوە کە بانکی ئەهلی عێراقییان ئاگادار کردووەتەوە کە نابێت جارێکی تر کێشەی لەو جۆرە دووبارە بێتەوە و بە هیچ شێوەیەک نابێت گرفت بۆ مووچەخۆران دروست بێت.