یەکێتی وەڵامی دانپێدانانەکەی ئەنجوومەنی ئاسایشی کوردستان دەداتەوە

ئاڤا نیوز

 

ئاڤا میدیا زانیویەتی یەکێتی نیشتمانیی کوردستان لەسەر دانپێدانانی یەکێک لە تۆمەتبارانی پشێوییەکانی گوندی لاجان کە لەلایەن ئەنجوومەنی ئاسایشی کوردستانەوە بە ڤیدیۆ بڵاو کرایەوە، هەڵوێستی دەبێت، ڕوونکردنەوەیەک بڵاودەکاتەوە و دانپێدانانەکە ڕەت دەکاتەوە.

 

وێنە گەورەکە: ئەمڕۆ پێنجشەممە ئەنجوومەنی ئاسایشی هەرێمی کوردستان دانبێپدانانی نێچیروان عیسا، بەرپرسی کۆمیتەی یەکێتیی نیشتمانیی کوردستان لە قەزای خەبات بڵاو کردەوە. ئەنجوومەنی ئاسایش هەرێمی كوردستان ڕایگەیاند، چەند لایەنێكی ناوخۆیی و دەرەكی دەستیان لە پشێوییەكانی ڕۆژانی ڕابردووی خەبات و گوندی لاجان هەبووە كە درێژكراوەی زنجیرەیەك پیلانی تێكدەرانەیە، ماوەیەكە دژی هەرێمی كوردستان نەخشەی بۆ كێشراوە.

 

ئەوەی پێویستە بیزانیت: بەگوێرەی دانپێدانەکەی ئەنجوومەنی ئاسایشی کوردستان، تۆمەتبار ناوی نێچیروان عیسا میر-ە، کە پێشتر بەرپرسی کۆمیتەی 14ی قەزای خەباتی یەکێتیی نیشتمانیی کوردستان بووە، تەمەنی 34 ساڵە و دەرچووی بەشی وەرگێڕانە، بە تۆمەتی نانەوەی پێشوی و توندوتیژی لە سنووری هەولێر دەستگیر کراوە.

 

دانپێدانانی فەرمی:  نێچیروان عیسا، بەرپرسی کۆمیتەی یەکێتی و تۆمەتباری ڕووداوەکەی قەزای خەبات و لاجان لەکاتی دانپێدانان کە ئەنجوومەنی ئاسایشی کوردستان بڵاوی کرەوە، دەڵێت: 'جەوهەر ئاغا' پێی وتم تەنسیقمان لەگەڵ کەتائیب سەیدولشوهەدا کردووە.

 

دەشڵێت، "بەرپرسێکی حەشدی شەعبی پێی وتم 135 کەسم دەوێت تاوەکو ڕاهێنانیانیان پێ بکەین لە کەتائیبی سەیدولشوهەدا. ڕاهێنانی ئەو کەسانە بۆ هەواڵگریی کەتائیبی سەیدولشوهەدا و دروستکردنی گرژی بووە لە سنووری هەولێر."