ژووری بازرگانی هەولێر: سەردانەكەی مەسرور بارزانی بۆ ئیمارات پەیوەندییە ئابوورییەكان فراوانتر دەكات

ئاڤا نیوز

پەیوەست بە پەیوەندییەکانی نێوان هەرێمی کوردستان و ئیمارات؛ شاندێكی ژووری بازرگانی و پیشەسازیی هەولێر سەردانی ئیمارات دەكات و چاوەڕوان دەكرێت چەندین یاداشتی لێكتێگەیشتن لە بواری ئاڵوگۆڕی بازرگانی واژۆ بكرێن.

چیرۆكی سەرەكی: ڕۆژی دووشەممە 8ـی كانوونی دووەم، شاندێکی ژووری بازارگانی و پیشەسازیی هەولێر، سەردانی ئیمارات دەکەن و لەگەڵ ژووری بازرگانیی ئەبوزەبی، ژووری بازرگانی و پیشەسازیی دوبەی و شاریقە و رەئسلخەیمە كۆ دەبنەوە.

لێدوانی فەرمی: گەیلان حاجی سەعید، سەرۆکی ژووری بازرگانی و پیشەسازیی هەولێر تایبەت بە ئاڤا ڕایگەیاند، ڕێككەوتێكی گونجاو و باشە كە ئێستا سەرۆكوەزیران مەسرور بارزانی سەردانی ئیماراتی كردووە و دەرگای پەیوەندییەكانی فراوانتر كردووە، ڕۆژی دووشەممە، شاندێكی ئەندامانی ژوورەكەمان سەردانی ئیمارات دەكەن و چەندین كۆبوونەوەی گرنگ لە بواری ئاڵوگۆڕی بازرگانی ئەنجام دەدەین، چاوەڕوان دەكرێت چەندین یاداشتنامەی لێکتێگەشتن لە بوارەكانی ئابووری و بازرگانی و پیشەسازی واژۆ بكرێن.

بۆچی گرنگە: بەهێزبوونی پەیوەندییەكانی نێوان هەرێمی کوردستان و ئیمارات گرنگ و بایەخدارن، بەتایبەت لە بواری وزە، وزەی نوێبووەوە، هاوردە و هەناردە، بەبازاڕکردنی بەرهەمی خۆماڵی، هاتنی براندە جیهانییەکان بۆ کوردستان، سوود وەرگرتن لە ئەزموونی ئەم وڵاتە و هاندانی سەرمایەگوزار و خاوەنكارانی هەرێمی كوردستان بۆ پەرەپێدانی ئاڵوگۆڕی بازرگانی.