پەیوەندییەکانی عێراق خۆی لە بڕیاری پۆلێنکردنی حیزبوڵڵا و حووسییەکان بێ بەری دەکات

ئاڤا نیوز

وەزارەتی پەیوەندییەکانی عێراق جەختی کردەوە کە لایەنێک نەبووە لە بڕیاری حکومەتی عێراق سەبارەت بە پۆلێنکردنی حیزبوڵڵای لوبنانی و گرووپی ئەنساروڵڵای حووسییەکان لە یەمەن وەک "گرووپی تیرۆریستی"، ئاماژەی بەوەشدا کە نوێنەری وەزارەت ئامادە نەبووە لەو کۆبوونەوەیەی بڕیارەکەی تێدا دەرچووە.

چیرۆکی سەرەکی: ڕۆژی پێنجشەممەی ڕابردوو، دادگای عێراق پۆلێنکردنی "حیزبوڵڵای لوبنانی" و گرووپی "ئەنساروڵڵای حووسییەکان"ـی وەک ڕێکخراوی تیرۆریستی پشتڕاستکردەوە، دوای بڵاوکردنەوەی لە ڕۆژنامەی وەقائیعی عێراقی بڕیارەکە چووە بواری جێبەجێکردنەوە، بەڵام دوای ماوەیەکی زۆر کورت لەو هەنگاوە پاشگەزبوونەوە ڕوویدا، بە ئاماژەدان بەوەی کە لیستە بڵاوکراوەکان پێداچوونەوە و وردبینییان بۆ نەکرابوو.

ڕاگەیێنراوی فەرمی: وەزارەتی پەیوەندییەکانی عێراق لە ڕاگەیێنراوێکدا ڕوونی دەکاتەوە "نوێنەری فەرمی وەزارەت لە لیژنەی سڕکردنی پارەی تیرۆریستان ئامادە نەبووە لە دانیشتنی کۆتایی کە گرێدرا و دەرەنجامەکانی لە ڕۆژنامەی وەقائیعی فەرمی بڵاوکرایەوە".

لەهەمان کاتدا: وەزارەتەکە ئاماژەی بەوەشداوە کە نوێنەری وەزارەت "لەو کاتەدا مۆڵەت بووە، و بەشداری نەکردووە لە دەنگدان لەسەر هیچ یەکێک لە بڕیارە دەرچووەکان".