حەج و عومرەی کوردستان: سبەی کۆتا وادەی وەرگرتنی مامەڵەی حاجییان دەبێت

ئاڤا نیوز

حەج و عومرەی کوردستان ئەو کەسانە ئاگادار دەکاتەوە کە تاوەکو ئێستا مامەڵەی چوونە حەجییان نەکردووە، سبەی دووشەممە کۆتا ڕۆژی وەرگرتنی مامەڵەکانیان دەبێت و هەر کەسێک دوابكه‌وێت، خۆی به‌رپرسیار ده‌بێت و کەسانی دیکە لە شوێنیان دادەنرێن.

وێنە گەورەکە: ئامادەکارییەکانی بەڕێوەبەرایەتی گشتیی حەج و عومرەی کوردستان بۆ بەجێگەیاندنی پڕۆسەی حەجی ساڵی داهاتوو بەردەوامە، سەدان کۆمپانیاش ناویان تۆمارکراوە بۆ ڕاییکردنی کارەکانی پڕۆسەی حەجخوازان.

لێدوانی فەرمی: کاروان ستونی، وتەبێژی فەرمی حەج و عومرەی کوردستان بە ئاڤای ڕاگەیاند، به‌ پێی ئه‌و ماوه‌یەی دانرابوو، سبەی دووشەممە 08-12-2025، كۆتا ڕۆژی وه‌رگرتنی مامه‌ڵه‌ی حاجییان ده‌بێت و هه‌ر كه‌سێك دوابكه‌وێت، خۆی به‌رپرسیار ده‌بێت و کەسانی یەدەگ، واتە جێگرەوە لە شوێنیان دادەنرێت.

ئاماژەی بەوەشدا، له‌ ڕێگه‌ی نووسینگه‌كانی حه‌ج و عومره‌ له‌ پارێزگا و ئیداره‌ سه‌ربه‌خۆكانه‌وه‌ په‌یوه‌ندییان به‌ هه‌موو ئه‌و كه‌سانه‌ كردووه‌ كه‌ ناویان بۆ حه‌جی 2026 گه‌ڕاوه‌ته‌وه‌ تاوه‌كوو مامه‌ڵه‌كانیان ته‌واو بكه‌ن.

ئەوەی پێویستە بیزانیت: ئه‌گه‌رچی بڕیاربوو 27-11-2025، دوا واده‌ی وه‌رگرتنی مامه‌ڵه‌ی حاجییان بێت، به‌ڵام  وه‌كو هاوكارییه‌ك بۆ ئه‌و كه‌سانه‌ی كه‌ ناویان گه‌ڕاوه‌ته‌وه،‌ تاوه‌كو 04-12-2025 واده‌كه‌ درێژكرایه‌وه‌ و دواتریش بۆ هەمان مەبەست و بۆ جاری دووەم تاوەکو 08-12-2025، بۆ دووەم جار وادەکە درێژ کرایەوە.