وتەبێژی بەرگریی شارستانی: كەشوهەوا ئەوەندە نالەبار نییە لە ناوەندەكانی خوێندن بكرێتە پشوو

ئاڤا نیوز

وتەبێژی بەرگریی شارستانیی هەرێمی كوردستان ڕایدەگەیێنێت، پێشبینییەكانی كەشوهەوا بەو ئەندازەیە مەترسیدار نین كە پێویست بكات پشوو لە قوتابخانە و ناوەندەكانی خوێندن ڕابگەیێنرێت، لەهەموو بارودۆخێكیش، ڕاگەیاندنی پشوو لە هەر پارێزگایێك یاخود ئیدارەیەكی سەربەخۆ، لە دەسەڵاتی پارێزگار یاخود سەرپەرشتیاریی ئیدارە سەربەخۆكانە.

وێنە گەورەکە: شەپۆڵێكی چڕی بارانبارین هەرێمی كوردستانی گرتووەتەوە، بەپێی پێشبینییەكانی كەشناسی، ئەمڕۆ دووشەممە و سبەی سێشەممە، لێزمە باران دەبارێت و ئەگەری دروستبوونی لافاو لە چەند شار و شارۆچكەیەكی هەرێمی كوردستان هەیە.

لێدوانی فەرمی: مقەدەم سەركەوت كاڕەش، وتەبێژی بەرگریی شارستانیی هەرێمی كوردستان بە ئاڤای وت، بەڕێوەبەرایەتیی گشتیی كەشناسی و بوومەلەرزەزانیی هەرێمی كوردستان هەڵسەنگاندن بۆ مەترسیی ڕووداوە سرووشتییەكان دەكات، بەڵام ڕاگەیاندنی پشوو لە قوتابخانە و ناوەندەكانی خوێندن، تەنیا لە دەسەڵاتی پارێزگار و سەرپەرشتیاریی ئیدارە سەربەخۆكانە، بەڵام بۆ ئێستا، دۆخەكە بەمجۆرە مەترسیدار نییە كە پشوو ڕابگەیێنرێت.

خاڵی ئەرێنی: بۆ ڕێگریكردن لە مەترسیی ڕوودانی لافاو، تیمەكانی ئاوەڕۆی هەولێر بەشێوەیەكی بەردەوام بەسەر گەڕەك و شەقامە گشتییەكان دابەشبوون و بەشێوەیەكی بەردەوام مەنهۆڵ و ڕێڕەوە ئاوییەكان پاك دەكەنەوە.

لەلایەكی دیكەوە: زەردەشت سەرسام، بەڕێوەبەری ئاوەڕۆی هەولێر بە ئاڤای ڕاگەیاند، تیمەكانیان بە شەو و ڕۆژ لە ئامادەباشیدا دەبن بۆ ئەوەی ئەگەر بارانی بەخوڕیش ببارێت، ئاو لە شەقام و كۆڵانەكان كۆنەبێتەوە و گرفت و ئاستەنگ بۆ هاتووچۆی هاووڵاتیان دروست نەبێت.

وتیشی لە هەر شوێنێك لافاو دروستبوو، با هاووڵاتیان لەڕێگەی ئەو ژمارە تەلەفۆنانەی بڵاومان كردووەتەوە پەیوەندی بكەن دەستبەجێ بە هانایانەوە دەچین.