سوودانی: ترەمپ داوای پاڵپشتی عێراقی بۆ وەرگرتنی خەڵاتی نۆبڵی ئاشتی لێکردم

ئاڤا نیوز

سەرۆکوەزیرانی عێراق، ئاشکرای دەکات کە دۆناڵد ترەمپ، سەرۆکی ئەمریکا، لە پەیوەندییەکی تەلەفۆنیدا داوای لێکردووە عێراق پاڵپشتیی بکات بۆ وەرگرتنی خەڵاتی نۆبڵی ئاشتی.

چیرۆکی سەرەکی: محەممەد شیاع سوودانی، سەرۆکوەزیرانی عێراق، بۆ یەکەمجار دوای ڕاگەیاندنی ئەنجامەکانی هەڵبژاردن و دەستپێکردنی گفتوگۆکانی پێکهێنانی حکومەت، لە چوارچێوەی بەرنامەیەکی تەلەڤیزیۆنیی لەگەڵ کەناڵی ڕابیعە، باسی لە چەند دۆسیەیەکی گرنگ کرد، لەوانە هەڵبژاردن و ئاسایش و دۆسیەی چەک.

لێدوانی ڕۆژنامەوانی: سوودانی ئاشکرای دەکات، دۆناڵد ترەمپ لە پەیوەندییەکی تەلەفۆنیدا داوای لێکردووە عێراق پاڵپشتیی بکات بۆ وەرگرتنی خەڵاتی نۆبڵی ئاشتی. هەروەها ڕایدەگەیێنێت، پەیوەندییەکانی عێراق لەگەڵ سووریا لە بەرژەوەندیی ئاسایش و سەقامگیریی عێراقدایە.

زانیاریی زیاتر: لەوەڵامی تۆمەتەکانی پشتگیریکردنی ئاساییکردنەوەی پەیوەندییەکان لەگەڵ ئیسرائیل پاش بەشداریکردنی لە کۆنفرانسی شەرم ئەلشێخ، سوودانی ڕایدەگەیێنێت، حکومەتەکەی ڕووبەڕووی زۆرترین چەواشەکاری و درۆ بووەتەوە.

لەلایەکی دیکەوە: سوودانی لەبارەی دۆخی دارایی وڵاتەکەی و پۆستی سەرۆکوەزیران، لە چاوپێکەوتنەکەدا سوودانی ئەمانەشی وت:

٠ چاکسازیی دارایی لە سەردەمی حکومەتەکەیدا بەدیهاتووە، بە پێچەوانەی ڕابردوو کە "دووکان و وەسڵی ساختە" هەبووە.

٠ کاتێک حکومەت دەستبەکاربووە، قەرزی ناوخۆیی گەیشتووەتە 70 تریلیۆن و 505 ملیار دینار. لە 152 تریلیۆن دینار، 125 تریلیۆنی بۆ مووچە، کڕینی دەرمان، خۆراک و 12 تریلیۆنی بۆ پڕۆژەکان و 13 تریلیۆنی بۆ گەڕەکانی مۆڵەتپێدان خەرجکراوە.

٠ کورتهێنانی بودجە لە ماوەی 3 ساڵدا گەیشتووەتە 180 تریلیۆن دینار.

٠ گۆڕینی پۆستی سەرۆکوەزیران بۆ تەنیا "وەزیفەیەک" قبووڵکراو نییە و حکومەت لاواز دەکات، هاوکات دووپاتی دەکاتەوە کە لە چوارچێوەی هەماهەنگیدا یاخی نەبووە.