بەرگریی شارستانی سۆران هۆشداری بە گەشتیاران دەدات

ئاڤا نیوز

بەهۆی هەڵکەوتەی شاخاوی سنووری ئیدارەی سەربەخۆی سۆران و داڕمانی شاخ، بەرگریی شارستانی هۆشداری بە گەشتیاران دەدات. ئەم بەیانیەش لە ڕێگای بێخاڵ بۆ خەلیفان چەند بەردێک لە شاخ بەربوونەتەوە سەر ڕێگاکە.

چیرۆکی سەرەکی: بەرەبەیانی ئەمڕۆ دووشەممە، لە ڕێگای بێخاڵ – خەلیفان، چەند بەردێک داڕمانە سەر ڕێگا، دوای ماوەیەکی کەمیش ڕێگاکە لەلایەن تیمەکانی بەرگریی شارستانی پاککرایەوە.

زانیاریی پەیامنێر: هاوار عەباس، پەیامنێری ئاڤا میدیا لە سۆران دەڵێت: بەرەبەیانی ئەمڕۆ چەند بەردێک لە شاخ کەوتنە خوارەوە بۆ سەر ڕێگای بیخاڵ - خەلیفان، هەرچەندە بەردەکان ڕێگاکەیان تەواو دانەخستبوو، بەڵام ئاستەنگی هاتووچۆیان دروست کردبوو، هەر زوو تیمەکانی بەرگریی شارستانی بەردەکانیان لابرد و ڕێگاکەیان خاوێن کردەوە.

لێدوانی فەرمی: موقەدەم کاروان میراودەلی، بەڕێوەبەری بەرگریی شارستانیی سۆران بە ئاڤای گوت: سنووری ئیدارەی سەربەخۆی سۆران ناوچەیەکی شاخاوییە و ئەگەری بارانی بەلێزمە و هاتنەخوارەوەی تاوێرەبەردەکان و گریمانە پچڕانی پردەکان و هەڵکشانی ئاو هەیە، مەترسی کێشەی گیرخواردنی هاونیشتمانیان و گەشتیاران هەیە، بۆیە داوا دەکەین لەم چەند ڕۆژە گەشتیار کەمتر ڕوو لە ناوچە شاخاوییەکان بکەن و دووربکەونەوە لەو شوێنانەی مەترسی لافاویان لەسەرە، داواش لە هاونیشتمانیان دەکەین بە وریایەوە هاتووچۆ بکەن.

زانیاریی زیاتر: موقەدەم کاروان میراودەلی، دووپاتی کردەوە بۆ هەر بارێکی لەناکاو لەهەر 20 بنکەی بەرگریی شارستانی سنووری ئیدارەی سەربەخۆی سۆران تیمی هەمیشەیی و تیمی پاڵپشتمان داناوە و بەردەوام لە ئەرکدا دەبن.