کۆمیسیۆن ئەنجامی هەڵبژاردنی ڕەوانەی دادگەی فیدراڵی کرد

ئاڤا نیوز

کۆمیسیۆنی هەڵبژاردنەکان دوای یەکلاییکردنەوەی تانەکان، ئەمڕۆ ئەنجامەکانی کۆتایی هەڵبژاردنی بۆ دادگەی باڵای فیدراڵی نارد بە مەبەستی پەسەندکردنی.

ڕاگەیێنراوی فەرمی: کۆمیسیۆنی باڵای سەربەخۆی هەڵبژاردنەکانی عێراق ڕایگەیاند: ئەمڕۆ بەیانی، ئەنجامی کۆتایی هەڵبژاردنی پەرلەمانی ڕەوانە دادگەی باڵای فیدراڵی کرا لەپێناو پەسەندکردنی.

لێدوانی فەرمی: جومانە غەلای، وتەبێژی کۆمیسیۆن بە ئاڤای ڕاگەیاند: بەپێی یاسا تایبەتەکانی کۆمیسیۆن ماوەی وەڵامدانەوە و پەسەندکردنی ئەنجامەکان لەلایەن دادگەی فیدراڵییەوە دیاری نەکراوە و ئەو بابەتە لای دادگەکەیە کە ماوەی چەند ڕۆژ ئەنجامەکان پەسەند دەکەن.

زانیاریی زیاتر: ڕۆژی یەکشەممە، دەستەی دادوەریی هەڵبژاردنی سەر بە کۆمیسیۆن پێداچوونەوەی خۆی بە سەرجەم تانەکان کە 853 تانە بوون لە دژی ئەنجامی هەڵبژاردنەکان پێشکەش کراون کۆتاییپێهێنا.

ئەوەی پێویستە بیزانیت: دوای ئەوەی دادگەی فیدراڵی ئەنجامەکانی هەڵبژاردنی خولی شەشەمی پەرلەمان پەسەند دەکات، ئینجا دوای ئەوە هەنگاوە کردارییەکان بۆ دانیشتنی پەرلەمان دەستپێدەکات، سەرۆکی پەرلەمان لە پشکی سووننەکان و سەرۆککۆمار لە پشکی کورد هەڵدەبژێردرێت، دواتریش سەرۆککۆمار کاندیدی گەورەترین فراکسیۆنی پەرلەمان بۆ پێکهێنانی حکومەت ڕادەسپێرێت.