فەرمانی دەستگیركردن بۆ ئەندامێکی یەكێتی لە ئەنجوومەنی پارێزگای دیالە دەرچوو

ئاڤا نیوز

لەسەر سكاڵای سێ پۆلیس، دادگای لێكۆڵینەوەی دیالە، فەرمانی دەستگیركردنی بۆ "ئەوس مەهداوی" تاكە ئەندامەكەی فراكسیۆنی یەكێتی لە ئەنجوومەنی پارێزگای دیالە دەردەكات.

چیرۆكی سەرەكی: دوای ئەوەی ئەوس ئیبراهیم مەهداوی، ئەندامی ئەنجوومەنی پارێزگای دیالە لەسەر فراكسیۆنی یەكێتیی نیشتمانیی كوردستان، پۆلیسی بازگەی خانەقین سەر بە بەڕێوەبەرایەتی بازگەكانی پارێزگای دیالەی بەوە تۆمەتبار كرد كە لە بازگەكان لەكاتی تێپەڕبوونی ئۆتۆمبێلی بارهەڵگر و كەلوپەل، سەرانە و باج لە شۆفێران وەردەگرن، لەسەر ئەو تۆمەتە، پاڵپشت بە ماددەی 433 لە یاسای سزاكانی عێراق كە تایبەتە بە تاوانی ناوزڕاندن، سێ پۆلیسی بازگەگان سكاڵایان لەدژی ئەو ئەندامەی ئەنجوومەنی پارێزگای دیالە جووڵاند.

زانیاریی بەدەستهاتوو: ئاڤا زانیویەتی دادوەری دادگای لێكۆڵینەوەی دیالە، لەسەر بنەمای سكاڵای سێ پۆلیسی بازگەكان، فەرمانی دەستگیركردنی بۆ ئەوس مەهداوی، ئەندامەكەی ئەنجوومەنی پارێزگاكە لە فراكسیۆنی یەكێتی دەركردووە، بەڵام ناوبراو تا ئێستا دەستگیر نەكراوە.

ئەوەی پێویستە بیزانیت: بەپێی یاسا، ئەندامی ئەنجوومەنی پارێزگاكان، پارێزبەندی یاسایی هەیە، جگە لەوەش ئەو ماددەیەی سكاڵای لەسەر تۆماركراوە، تاوانەكەی ناوزڕاندنە و لەجۆری كەتنە، كەسی دەستگیركراو دەستبەجێ بە دەستەبەری (كەفالە) ئازاد دەكرێت.

لەلایەكی دیكەوە: ئاڤا هەوڵیدا پەیوەندی بە ئەوس مەهداوی بكات، بەڵام ژمارەكەی بەردەست نییە و  ناتواندرێت پەیوەندی پێوە بكرێت.

باكگراوند: ئەوس ئیبراهیم مەهداوی، هەرچەندە لە پێكهاتەی عەرەبە، بەڵام لە هەڵبژاردنی ساڵی 2023ـی ئەنجوومەنی پارێزگاكانی عێراق، لەسەر لیستی یەكێتی خۆی بۆ ئەندامی ئەنجوومەنی پارێزگای دیالە كاندید كرد و سەركەوتنی بەدەستهێنا.