سزادراوانی چاکسازیی گەورانی هەولێر لە یەک مانگدا زیاتر لە هەزار پەیوەندی دەنگ و ڕەنگیان کردووە

ئاڤا نیوز

تەنیا لە ماوەی مانگی ڕابردوو، سزادراوان لە چاکسازیی گەورانی هەولێر، زیاتر لە هەزار پەیوەندی دەنگ و ڕەنگ (video call)ـیان لەگەڵ کەسوکاریان کردووە.

وێنە گەورەکە: لە چوارچیوەی سیستەمی چاکسازی سزادراوان لە هەرێمی کوردستان، ڕەچاوی ئەوە دەکرێت، هیچ کات سزادراوان لە کۆمەڵگا دانەبرێن، بۆ ئەمەش لە ماوەی بەسەربردنی ماوەی سزایان بەردەوام لە ڕێگەی سەردانی کەسوکاریان بۆ چاکسازییەکان و پەیوەندی تەلەفۆنی، بەردەوام لە پەیوەندیدا بن.

پێدراوە ڕاستەکان: بەپێی ئامارەکانی بەڕێوەبەرایەتیی چاکسازیی گەورانی هەولێر، تەنیا لە ماوەی مانگی ڕابردوو، سزادراوانی ئەو چاکسازییە زیاتر لە هەزار و 100 پەیوەندی دەنگ و ڕەنگیان لە ڕێگەی ڤایبەر و واتسئەپ، لەگەڵ کەسوکاریان کردووە.

ئەوەی پێویستە بیزانیت: ماوەی پێنج ساڵە ئەو خزمەتگوزارییە لە بەڕێوەبەرایەتیی چاکسازیی گەورانی هەولێر کاری پێدەکرێت، خزمەتگوزارییەکەش بەردەوامە.

زانیاریی زیاتر: هەموو ئەو سزادراوانەی (بیانین، کەسوکاریان لە دەرەوەی وڵاتە، نەخۆشن، پەککەوتەن)، دەتوانن هەفتانە و بەپێی پێویست تەلەفۆن بۆ کەسوکاری خۆیان بکەن و بەشیوەی دەنگ و ڕەنگ قسە بکەن، ئەمە جیا لەوەی هەموو سزادراوان بۆیان هەیە لە ڕێگەی تەلەفۆنەوە (تەنیا بە دەنگ) قسە لەگەڵ کەسوکاریان بکەن.

بۆچی گرنگە: لە ڕێگەی ئەم جۆرە پەیوەندییە، کەسوکاری سزادراوان بەردەوام ئاگاداری کەسە سزادراوەکانیان دەبن، لەهەمان کاتیش سزادراوەکان لە کۆمەڵگا دانابڕین، ئەمەش کاریگەری ڕاستەوخۆی لەسەر ئارامی دەروونی سزادراوان دەبێت.