پسپۆڕێکی یاسایی: کردنەوەی دەرگای سیڤی بۆ پۆستی سەرۆکوەزیران لادانی دەستوورییە

ئاڤا نیوز

پسپۆڕێکی یاسایی عێراق جەخت دەکاتەوە کە داواکارییەکان بۆ پێشکەشکردنی سیڤی بۆ پۆستی سەرۆکوەزیران، پێشێلکردنێکی ڕوونی دەستوور و میکانیزمەکانی ڕاسپاردنی پۆستی سەرۆکوەزیرانە.

چیرۆکی سەرەکی: چوارچێوەی هەماهەنگی دەرگای کاندیدبوونی گشتی بۆ پۆستی سەرۆکوەزیران لە ڕێگەی وەرگرتنی سیڤی کردەوە، لەم چوارچێوەش 45 کەسایەتی خۆیان بۆ ئەو پۆستە پاڵاوتووە و سیڤی خۆیان پێشکەش لێژنەی دیارکردنی سەرۆکوەزیران کردووە.

لێدوانی فەرمی: راوێژکار و پسپۆڕی یاسایی، سالم حەواس، ئەمڕۆ دووشەممە ڕایگەیاند: داواکارییەکان بۆ پێشکەشکردنی سیڤی بۆ پۆستی سەرۆکوەزیران، لادانێکی ڕوونە لە دەستوور بەپێی میکانیزمەکانی ڕاسپاردن کە لە ماددەی 76ـی دەستووردا هاتووە.

سالم حەواس ئەمانەشی وت:

٠ پێشکەشکردنی سیڤی بۆ ئەو کەسانەی خوازیاری پۆستی سەرۆکوەزیرانن، پشت بە هیچ دەقێکی دەستووری نابەستێت و لە چوارچێوەی ئەو میکانیزمانەدا نییە کە دەستوور بۆ ڕاسپاردنی کاندید دیاریکردووە.

٠ پۆستی سەرۆکوەزیران ئەرکێکی ئاسایی نییە، ئەمە کۆمپانیای هاوبەشی و ڕیکلامی بازرگانی نییە، بەڵکو پۆستێکی سیادییە و پەیوەستە بە مافێکی هەڵبژاردنی ڕوون کە قبوڵی گۆڕانکاری سیاسی ناکات.