بەرهەمهێنانی نەوت لە گەورەترین کێڵگەی عێراق ڕاگیرا

ئاڤا نیوز

دوو بەرپرسی کەرتی وزەی عێراق بە ئاژانسی ڕۆیتەرزیان ڕاگەیاند، بە هۆی بوونی گرفت و دزەکردن لە یەکێک لە بۆرییەکانی هەناردەکردن، پرۆسەی بەرهەمهێنانی نەوت لە کێڵگەی ڕۆژئاوای قورنە 2 بە تەواوی ڕاگیراوە.

چیرۆکی سەرەکی: ئەمڕۆ دووشەممە بەرهەمهێنانی نەوت لە کێڵگە لەلایەن کۆمپانیای لوک ئۆیڵی ڕووسی  وەستێنراوە، کە قەبارەی بەرهەمهێنانی کێڵگەکە دەگاتە نزیکەی 460 هەزار بەرمیل نەوت لە ڕۆژێکدا.

زانیاریی زیاتر: کێڵگەی ڕۆژئاوای قورنە 2، بە یەکێک لە گەورەترین کێڵگە نەوتییەکانی جیهان دادەنرێت، کە بەرهەمەکەی نزیکەی 460,000 بەرمیلە لە ڕۆژێکدا، نزیکەی 0.5%ـی کۆی دابینکردنی نەوتی جیهان و 9%ـی کۆی بەرهەمی عێراق پێکدەهێنێت، کە عێراق دووەم گەورەترین بەرهەمهێنەری ڕێکخراوی ئۆپێکە لەدوای سعوودیە، ئەمەش وایکردووە هەر ڕاگرتنێک کاریگەریی لەسەر بازاڕەکانی وزە هەبێت و یەدەگی نەوتی ئەم کێڵگەیە بە نزیکەی 14 ملیار بەرمیل مەزەندە دەکرێت.

ئەمەش بزانە: کێڵگەکە دەکەوێتە پارێزگای بەسرە لە باشووری عێراق تا ئێستا بەرپرسانی عێراق و کۆمپانیا ڕووسییەکە کاتی دەستپێکردنەوەی هەناردەکردنیان دیاری نەکراوە، بەڵام تیمە تەکنیکییەکان سەرقاڵی چاککردنەوەی بۆرییەکانن بۆ ئەوەی لە زووترین کاتدا بەرهەمهێنان دەستپێبکاتەوە، چونکە عێراق بۆ داهاتەکەی بەشێوەیەکی سەرەکی پشت بە هەناردەی نەوتی باشوور دەبەستێت.