دەستەی نەزاهەی عێراق: زیاتر لە 17 ملیۆن دۆلارمان گەڕاندووەتەوە

ئاڤا نیوز

 

دەستەی نەزاهەی فیدراڵی ڕایگەیاند، لە ماوەی ڕابردوودا توانیویانە زیاتر لە 17 ملیۆن دۆلار لە دۆسیەكانی گەندەڵی لەناوخۆ و دەرەوە بگەڕێنێتەوە بۆ گەنجینەی دەوڵەت.

 

ڕاگەیێندراوی فەرمی: دەستەی نەزاهەی عێراق ئاشكرایكرد، بڕی 17 ملیۆن و 438 هەزار و 620 دۆلاری ئەمریكییان گێڕاوەتەوە بۆ خەزێنەی دەوڵەت كە بە گەندەڵی و  قاچاخ لەلایەن كەسانی داواكراوی یاساییەوە برابوون.

ئەم پڕۆسەیە بە هەماهەنگی چڕ لەگەڵ لایەنە دادوەری و چاودێرییەكان لەناو عێراقدا و لە ڕێگەی پەیوەندی بە لایەنە نێودەوڵەتییە پسپۆڕەكانەوە ئەنجامدراوە، بەپێی ئەو ڕێككەوتننامە و یاسایانەی كاریان پێدەكرێت.

 

لێدوان فەرمی: دەستەی نەزاهەی عێراق ڕایگەیاند، ئەم دەستكەوتە نیشانەی پابەندبوونی قووڵی ئێمەیە بۆ بەرەنگاربوونەوەی گەندەڵی و گەڕاندنەوەی سەروەت و سامانی نیشتمانی بۆ خەڵكی عێراق.

نەزاهە دەڵێت بەردەوام دەبین لە كاركردن بە هەماهەنگی لەگەڵ هەموو لایەنە ناوخۆیی و نێودەوڵەتییەكان بۆ دڵنیابوون لە دادپەروەری و لێپرسینەوە.

 

لە لایەكی دیكەوە: دەستەی نەزاهە دەستی بە كردنەوەی سیستەمی پشتیوانی ئەلیكترۆنی  (I cass)ی سەر بە وەزارەتی دەرەوە كردووە. ئەمەش ڕێگە بە دەستەكە دەدات سەیری ئەو داتایانە بكات كە لە سیستمەكەدا تۆمار كراون و تایبەتن بە زانیاری هاووڵاتیانی عێراقی نیشتەجێی دەرەوەی وڵات. 

 

زانیاری زیاتر: دەستەی نەزاهە دەستی بە كاركردن كردووە لەسەر گەیشتنی ڕاستەوخۆ بە بنكەكانی ئینتەرپۆل و ئەو زانیارییانەی كە پەیوەندییان بە دۆسییەكانیانەوە هەیە لە بواری بەرەنگاربوونەوەی گەندەڵیدا، ئەمەش تواناكانی دەستەكە بۆ بەدواداچوونی داواكراوان و گەڕاندنەوەی پارەی دزراو بەهێز دەكات و كاتی گەیشتن بە زانیارییەكان خێراتر دەكات.

 

گەندەڵییەکە زۆر گەورەترە: بەپێی بەڵگەکانی ڕێکخراوی شەفافیەتی نێودەوڵەتی، دیوانی چاودێریی دارایی عێراق و دەستەی نەزاهە، لە ساڵی 2003 بۆ 2025 بە نزیکەیی ترلیۆنێک و 460 ملیار دۆلار بە گەندەڵیی و قاچاخ دزراوە و ئەو بڕە پارەیەی توانراوە بهێنرێتەوە بۆ خەزێنەی گشتی ناگاتە 2٪ی بڕی پارەی دزراو.