ئاژانسی هاوار: مووچەی مامۆستایانی سووریا دوا دەکەوێت

ئاڤا نیوز


ئاژانسی هەواڵی "هاوار" بڵاوی کردووەتەوە، مامۆستا و فەرمانبەرانی کەرتی پەروەردەی حکومەتی نوێی سووریا بەدەست دواکەوتنی زۆری مووچە دەناڵێنن، ئەمەش لە کاتێکدایە حکومەت بەڵێنەکانی بۆ زیادکردنی مووچەی مامۆستایان جێبەجێ نەکردووە.

بڵاوکراوەی فەرمی: بەگوێرەی ئەو زانیارییانەی ئاژانسەکە بڵاویکردووەتەوە، نۆ ڕۆژ لەم مانگە تێپەڕیوە تاوەکو ئێستا مووچەی مامۆستایان دابەش نەکراوە، مانگی پێشووش 12 ڕۆژ تێپەڕی ئینجا مووچەی ئەم چینە دابەشکرا لە دیمەشق.

 - پڕۆسەی خەرجکردنی پارەکە لە بەرنامەی "شام کاش"ەوە گوڕا بۆ دامەزراوەت "بەرید"، ئەمەش بووە هۆی ئەوەی ستافی پەروەردە ناچاربوون لە ڕیزی درێژدا بوەستن بۆ وەرگرتنی مووچەکانیان، بەبێ هیچ پاساوێکی فەرمی ڕوون.

زانیاریی زیاتر: "هاوار" ئەوەشی خستووەتەڕوو،  "کەموکوڕییەکی ڕانەگەیێندراو" لە میکانیزمی مامەڵەکردن لەگەڵ ئەو یارمەتییە داراییانەی کە لە سعوودیە و قەتەرەوە بۆ وەزارەتی پەروەردە دەدرێن بوونی هەیە، ئەمە جگە لە دابەزینی متمانە بە میکانیزمی گواستنەوەی پارە لە ڕێگەی بەرنامەی "شام کاش"، کە بووە هۆی خەرجکردنی مووچە لە ڕێگەی دامەزراوەی "بەرید" لەبری ئەوەی بخرێتە سەر بانکە حکومییەکانی ئاسایی وەک بانکی "بازرگانی سووریا" وبانکی "عەقاری".