شەرع نیازی خۆی بۆ برەودان بە پەیوەندییەکانی لەگەڵ عێراق دەردەبڕێت

ئاڤا نیوز

ڕۆژی دووشەممە، ئەحمەد شەرع، سەرۆککۆماری سووریا ڕایگەیاند: وڵاتەکەی توانیویەتی جۆرێک لە هاوسەنگی لە پەیوەندییە ناوچەیی و نێودەوڵەتییەکانیدا بەدی بهێنێ و ئاماژەی بە پەیوەندیی نێوان سووریا و عێراق کرد.

ڕاگەیێنراوی فەرمی: شەرع لە بۆنەیەکی ساڵیادی ڕووخانی دەسەڵاتی ئەسەد لە دیمەشق، پەیوەندیی وڵاتەکەی لەگەڵ تورکیا، سعوودیە، قەتەر و ئیمارات بە نایاب وەسف کرد، هاوکات ئاماژەی بەوەدا کە پەیوەندییەکانی لەگەڵ میسر و عێراق باشە هاوکات هیوای خۆی بۆ باشترکردن و برەودان بە پەیوەندییەکانی لەگەڵ ئەو دوو وڵاتە دەربڕی.

سەرۆکی سووریا ئاماژەی بەوەش دا، پەیوەندییەکانی نێوان وڵاتەکەی و هەر یەکە لە ئەمریکا، چین و ڕووسیا لە ئاستێکی باش دان.

زانیاریی زیاتر: دوێنێ دووشەممە 8ی کانوونی یەکەم کە دەکاتە ساڵیادی ڕووخانی دەسەڵاتی بەشار ئەسەد و حیزبی بەعس، ئەحمەد شەرع لە مزگەوتی ئومەوی لە ناوجەرگەی دیمەشق پێشنوێژی بۆ خەڵکی کرد و ڕایگەیاند: "سووریایەکی بەهێز بوونیاد دەنێین کە شایستە بێت بە مێژوو و شارستانیەتییەکەی".