ڕاوێژکارێکی شەرع: شاندەکانی هەسەدە بۆ دیمەشق دەسەڵاتی بڕیاردانیان نییە

ئاڤا نیوز

ڕاوێژکارێکی سەرۆککۆماری سووریا دەڵێت، ئەو شاندانەی هەسەدە ڕەوانەی دیمەشقیان دەکات دەسەڵاتی جێبەجێکردنیان نییە و ئەو هێزە کات دەکوژێت، بۆیەش ئەمریکا و تورکیا لە جێبەجێنەکردنی ڕێککەوتنەکەی 10ـی ئازاردا، هەسەدە بە بەرپرسیار دەزانن.

لێدوانی فەرمی: ئەحمەد مۆفەق زێدان، ڕاوێژکاری سەرۆککۆماری سووریا بە ماڵپەڕی حەدەسی سعوودی ڕاگەیاندووە، ڕێککەوتنەکەی 10ـی ئازار لەنێوان دیمەشق و هەسەدە بە ئامادەبوونی ئەمریکا و تورکیا واژۆکراوە و چوارچێوەیەکی بنەڕەتییە بۆ هەموو لایەنەکانی سووریا، بەڵام هەسەدە کات دەکوژێت نەک دەوڵەتی سووریا، چونکە ئەو شاندانەی ڕەوانەی دیمەشقیان دەکات بۆ جێبەجێکردنی ڕێککەوتنەکە، دەسەڵاتی جێبەجێکردن و بڕیاردانیان نییە ئەوەش هەڵسەنگاندنی لایەنە نێودەوڵەتی و هەرێمییەکانە بۆ ڕێککەوتنەکە.

دەشڵێت، هەوڵدان بۆ وەبەرهێنان لە پشێوی سووریادا کارێکی هەڵەیە و سەردەمی ئەوەی خاوەندارییەتی دەکرد  [ئەسەد] ڕۆیشتووە.

باکگراوند: ڕۆژی 10-03-2025 ئەحمەد شەرع، سەرۆكکۆماری سووریا و مەزڵووم عەبدی، فەرماندەی گشتی هەسەدە ڕێککەوتنێکی مێژوویان واژۆکرد، بەگوێرەی ڕێککەوتنەکەش هەسەدە دەبێتە بەشێک لە وەزارەتی بەرگریی سووریا و دەوڵەتی سووریاش مافە دەستوورییەکانی کورد گەرەنتی دەکات.