بەفر و سەرمای توند باکووری کوردستان دەگرێتەوە؛ ڕێگەکان داخران و دەریاچەکان بەستوویانە

ئاڤا نیوز

شەپۆلێکی بەفربارین و سەرمای توند حەوت پارێزگای باکووری کوردستانی گرتەوە و بەهۆیەوە پلەکانی گەرما بۆ 9 پلەی ژێر سفر دابەزیون، کەڵەکەبوونی بەفرەکەش کە لە هەندێک شوێن دەگاتە نیو مەتر، بووەتە هۆی داخستنی بەشێک لە ڕێگەوبانەکان.

چیرۆکی سەرەکی: بەفربارینەکە پارێزگاکانی (قەرس، وان، مووش، بەدلیس، ئەردەخان، شرناخ و جۆلەمێرگ)ی گرتووەتەوە. بەهۆی توندیی سەرماکەوە، دەریاچەی "چاڵی" لە قەزای قەرس، کە 2 هەزار و 237 مەتر لە ئاستی دەریاوە بەرزە، بەتەواوی بەستوویەتی و بووەتە سەهۆڵبەندان.

زانیاریی زیاتر: سەرەڕای ئەوەی دۆخەکە ژیانی هاووڵاتییانی سەخت کردووە، بەڵام دیمەنێکی دڵڕفێنی بە ناوچەکە بەخشیوە، بەتایبەت لە دارستان و دۆڵەکانی قەزای "قامووشان" لە قەرس کە 2 هەزار و 150 مەتر لە ئاستی دەریاوە بەرزن و بە ئاژەڵی کێوی وەک (ورچ، گورگ، ڕێوی و پشیلەی کێوی) بەناوبانگن، ئێستا بەتەواوی سپیپۆش بوون.